Аўтобус, на якім дзіцячы праваслаўны хор вяртаўся з Санкт-Пецярбургу, трапіў у ДТЗ на 251 кіламетры аўтадарогі Санкт-Пецярбург — Невель — у яго ўрэзаўся кіроўца вялікагрузнага аўтамабіля, які рухаўся ў тым жа кірунку. У аўтобусе знаходзілася 54 чалавекі, у тым ліку 41 дзіця ва ўзросце ад 6 да 13 гадоў.
Інфармацыя аб ДТЗ з беларускімі дзецьмі хутка распаўсюдзілася ў СМІ і інтэрнэце. Бацькі, вядома, запанікавалі. Але арганізатары канцэртнага тура адзначаюць, што сітуацыя ўвесь час знаходзілася пад кантролем, а сама паездка была арганізавана з улікам усіх правіл перавозкі дзяцей.
Але зараз усе хваляванні прайшлі: у сераду позна ўвечары ўдзельнікі хору вярнуліся дамоў. Аўтобус спыніўся каля храма, і бацькі паспяшаліся абняць маленькіх падарожнікаў.
А ў Доме міласэрнасці быў адслужаны падзячны малебен аб шчаслівым заканчэнні дарогі.
Дарэчы, у Санкт-Пецярбурзе дзіцяча-юнацкі хор стаў лаўрэатам конкурсу "Песні над Нявой", заняўшы 3 месца сярод прафесійных узорных хораў.
