МІНСК, 24 сак—Sputnik. Цэрымонія развітання з малодшым сынам экс-прэзідэнта Украіны і былым лідэрам некалі кіруючай Партыі рэгіёнаў Віктарам Януковічам прайшла ў Севастопалі, паведамляюць украінскія СМІ.
Малодшы Януковіч, паводле звестак прэс-службы Партыі рэгіёнаў, трагічна загінуў 20 сакавіка. Напярэдадні ўкраінскія СМІ напісалі пра тое, што сын экс-прэзідэнта знаходзіўся за рулём мікрааўтобуса, які праваліўся пад лёд на Байкале і патануў.
Былы прэзідэнт Украіны Віктар Януковіч і члены яго сям'і прысутнічалі ў панядзелак на пахаванні сына Віктара на мемарыяльных воінскіх могілках у Севастопалі, паведаміў адзін са служыцеляў Свята-Нікольскага храма.
"На адпяванні былі сваякі, у тым ліку Януковіч. Жанчына, мяркуючы па ўсім маці, моцна плакала. Быў яшчэ маленькі хлопчык, напэўна, сын, і некалькі чалавек, хутчэй за ўсё, сваякі",—цытуе "Крыминформ" словы служыцеля.
Ён паведаміў, што цела даставілі ў храм на Брацкіх мемарыяльных могілках у ноч з 22 на 23 сакавіка, пры гэтым пахавальныя набажэнствы ішлі да раніцы. Сваякі прыехалі на адпяванне і пахаванне ўжо днём 23 сакавіка, могілкі ў гэты час былі ачэплены ахоўнікамі.
Агенцтва "Reuters" апублікавала фатаграфіі з цэрымоніі пахавання. На іх відаць, што магчымая магіла Януковіча-малодшага размешчана на агароджанай тэрыторыі і не мае якіх-небудзь апазнавальных знакаў. Побач стаяць вянкі з жалобнымі надпісамі: "Любімаму сыночку ад бацькоў", "Ад жонкі", "Ад калег".
Афіцыйнага пацверджання гібелі на Байкале малодшага сына Януковіча па-ранейшаму няма.
