МІНСК, 13 ліс — Sputnik. Гомельскія памежнікі па інфармацыі ад украінскіх калегаў затрымалі двух грамадзян Украіны, якія падчас рыбалкі з лодкі выпадкова перасеклі беларускую мяжу, паведамілі Sputnik у Дзяржаўным памежным камітэце.
Як толькі беларускія памежнікі атрымалі сігнал аб магчымым нелегальным перасячэнні мяжы, аддзел берагавой аховы "Лоеў" тут жа адправіў трывожную групу на памежным катэры. У ходзе праверкі факт парушэння мяжы пацвердзіўся.
"Нарад затрымаў двух грамадзян Украіны: аднаму — 34 гады, другому — 37, дакументаў у іх не аказалася", — сказалі ў ДПК.
Грамадзяне суседняй дзяржавы лавілі рыбу з маламернага судна з маторам. Па іх словах, аб тым, што патрапілі на тэрыторыю Беларусі, яны не ведалі.
За парушэнне рэжыму мяжы на ўкраінцаў былі складзеныя адміністрацыйныя пратаколы. Пасля мужчын перадалі ўкраінскім памежнікам. Судна накіравана ў Гомельскую мытню, яго лёс вырашыць суд.
