МІНСК, 24 лют — Sputnik. Прэзідэнт Грузіі Георгій Маргвелашвілі прызнаўся ў эфіры беларускага тэлебачання ў тым, што не змог вырасціць такую ж добрую бульбу, як у свайго беларускага калегі.
Маргвелашвілі сустракаўся ў мінулы раз з прэзідэнтам Беларусі Аляксандрам Лукашэнкам у 2015 годзе — тады беларускі лідэр наведваў з афіцыйным візітам Грузію.
"Вось Аляксандр Рыгоравіч падарыў мне бульбу, якую я пасеяў, беларускую бульбу. Я выгадаваў, але не такую добрую. Я потым бачыў яго фота на Facebook. У яго такія вялікія мяшкі, і бульба вялікая такая. У мяне так добра не выйшла", — прызнаўся прэзідэнт Грузіі ў эфіры тэлеканала "Беларусь 1".
Грузінскі лідэр дадаў, што, як і прэзідэнт Беларусі, ён жыве за горадам.
Наступны афіцыйны візіт Маргвелашвілі ў Беларусь прызначаны на пачатак сакавіка бягучага года — мяркуецца, што прэзідэнт Грузіі прыбудзе ў рэспубліку 1 і 2 сакавіка, на гэтыя даты ўжо запланаваны шэраг сустрэч.
