У Чарнобылі адбылася сустрэча прэзідэнтаў Беларусі і Украіны, прымеркаваная да 31 гадавіны аварыі на ЧАЭС. Кіраўнікі дзяржаў ушанавалі памяць герояў-ліквідатараў і ахвяр катастрофы. У час наведвання Чарнобыльскай атамнай станцыі Аляксандр Лукашэнка падкрэсліў, што Беларусі і Украіне неабходна ўзмацніць узаемадзеянне па чарнобыльскай праблематыцы.
Акрамя таго, кіраўнікі дзвюх дзяржаў наведалі пляцоўку сховішча адпрацаванага ядзернага паліва і азнаёміліся з будаўніцтвам новага ахоўнага збудавання над чацвёртым энергаблокам ЧАЭС.
Далей Аляксандр Лукашэнка і Пётр Парашэнка прадоўжылі размову на тэрыторыі Гомельскай вобласці. Перамовы кіраўнікоў дзвюх краін у фармаце сам-насам праходзяць у Ляскавічах. На парадку дня — гандлёва-эканамічнае супрацоўніцтва і палітычнае ўзаемадзеянне дзвюх краін, а таксама міжнародная сітуацыя і далейшыя намаганні па мірным урэгуляванні канфлікту на паўднёвым усходзе Украіны.
Што ўяўляе сабой Чарнобыль сёння і якая сітуацыя на тэрыторыях, пацярпелых ад Чарнобыльскай аварыі, на радыё Sputnik Беларусь распавялі прадстаўнікі дэпартамента па ліквідацыі наступстваў катастрофы на ЧАЭС — начальнік аддзела навуковага забеспячэння і міжнароднага супрацоўніцтва Ігар Семяненя і начальнік упраўлення рэабілітацыі пацярпелых тэрыторый Дзмітрый Паўлаў.
"Сітуацыя на пацярпелых тэрыторыях паступова паляпшаецца, ідзе натуральны распад радыенуклідаў. Рэгіён паступова чысціцца, памяншаецца як шчыльнасць забруджвання, так і яго межы. Дозы апраменьвання, якія атрымліваюць людзі на забруджаных тэрыторыях, бяспечныя для здароўя", — адзначыў Семяненя.
Паводле слоў спецыяліста, дзякуючы распрацаваным навуковым тэхналогіям сёння ёсць магчымасць атрымліваць на "забруджаных" тэрыторыях чыстую прадукцыю. Калі чалавек штогод абследуецца, праходзіць пільны кантроль, які выяўляе захворвання на ранніх стадыях, то пагрозы яго жыццю і здароўю мінімальныя.
"За "постчарнобыльскі" перыяд у Беларусі з'явілася ўласная радыелагічная культура, заснаваная на свабодным доступе да інфармацыі. Але пры гэтым існуе ўкаранелая радыяфобія, размовы пра нейкіх мутантаў, і тут галоўную ролю гуляюць пэўныя дадзеныя і магчымасць убачыць тое што, адбываецца ў чарнобыльскім рэгіёне, на свае вочы", — сказаў Паўлаў.
Сёння аварыйны рэактар на Чарнобыльскай АЭС зачынены велізарным купалам — складаным інжынерным збудаваннем, закліканым мінімізаваць небяспеку ўцечкі радыяцыі.
Поўную версію размовы з прадстаўнікамі дэпартамента па ліквідацыі наступстваў катастрофы на ЧАЭС слухайце на радыё Sputnik Беларусь.
