МІНСК, 17 мая — Sputnik. Фінал Міжнароднага конкурсу стартап-праектаў "BizTech BSU StartUp Contest" адбудзецца 19 мая ў БДУ, паведамілі Sputnik у прэс-службе ВНУ.
"Мерапрыемства накіравана на аказанне дапамогі бізнесменам пачаткоўцам у прасоўванні і рэалізацыі ідэй, развіццё прадпрымальніцкага мыслення і прыцягненне прадстаўнікоў бізнес-супольнасці да ўдзелу ў адукацыйных праектах універсітэта", — распавялі ў Белдзяржуніверсітэце.
У фінальным паядынку выступяць 15 каманд з БДУ, БДУІР, Баранавіцкага дзяржаўнага ўніверсітэта, Полацкага дзяржаўнага ўніверсітэта, Гомельскага тэхнічнага ўніверсітэта імя П. В. Сухога. Таксама свае праекты прадставяць Школьная бізнес-кампанія "ДАРУ.nak", вэб-студыя "Ilavista" ТАА "ДатаЦэнтр".
У гэтым годзе пераможцаў вызначаць у чатырох намінацыях:
- "Фінтэх-стартап",
- "Сацыяльна-значны стартап",
- "Глабальны стартап",
- "Адукацыйны стартап".
Праекты будуць ацэньваць прадстаўнікі банкаўскай сферы, бізнэсоўцы і выкладчыкі эканамічнага факультэта БДУ. Стваральнікам лепшых праектаў прапануюць падтрымку ментараў і стажыроўку ў кампаніях, якія зацікавіліся іх распрацоўкамі.
Усяго на конкурс было пададзена 67 праектаў студэнтаў з Беларусі, Расіі і Украіны.
