БРЭСТ, 17 жні — Sputnik. Кароткія іміджавыя відэаролікі могуць транслявацца ў кінатэатрах і на беларускіх тэлеканалах, такую прапанову агучыў на прэзентацыі старшыня Брэсцкага гарвыканкама Аляксандр Рагачук.
Усяго творчая група тэлекампаніі "СТБ" зняла пяць міні-фільмаў, кожны з якіх па-свойму расказвае пра горад. На відэа патрапілі вядомыя брэсцкія месцы, падзеі і людзі. Усе ролікі сканчаюцца адпаведным тэме лагатыпам і слоганам "Тут пачынаецца Радзіма".
Героі некаторых міні-фільмаў — таленавітая брэстаўчанка Дарыя Скамарошчанка, якая ўдзельнічала ў папулярных расійскіх тэлешоў, і ліхтаршчык Брэста Віктар Кірысюк. У адным роліку зняўся спявак Саша Нэма. У здымках таксама ўдзельнічалі акцёры Брэсцкага акадэмічнага тэатра драмы і музыкі.
"Інвестыцыйная прывабнасць праяўляецца ў тым ліку і ў тым, як горад сябе пазіцыянуе. Наша задача — пазіцыянаваць Брэст як сучасны, крэатыўны горад, каб інвестар сюды ішоў, ствараў працоўныя месцы. Каб укладваў сюды грошы, разумеючы, што Брэст — гэта перспектыўны горад", — адзначыў на прэзентацыі мэр Аляксандр Рагачук.
Старшыня гарвыканкама распавёў, што прадстаўленыя ролікі — толькі пачатак вялікага серыяла пра Брэст. З ідэямі для новых сюжэтаў у гарвыканкам можа звярнуцца любы жадаючы.
Задумку аднаго з будучых ролікаў агучылі — па дапамогу ў здымках творчая група звярнулася да касманаўта Алега Навіцкага, які дзеля наступнага відэа паспрабуе зняць Брэст з космасу.
"Мы абсалютна бясплатна будзем прапаноўваць ролікі ўсім нашым кінавідэапрадпрыемствам і ўсім тэлеканалам для сацыяльнай рэкламы", — рэзюмаваў Рагачук.
