МІНСК, 12 вер — Sputnik. Два выпадкі нападу ваўкоў на хатнюю жывёлу зафіксаваныя ў Светлагорскім раёне з пачатку верасня бягучага года, паведаміла газета "Ранак".
Паводле інфармацыі выдання, у першым выпадку драпежнікі зарэзалі трох цялят на ферме ў вёсцы Асташкавічы, у другім — забілі дзве авечкі і казу на прыватным падворку ў населеным пункце Мартынаўка.
У БТПР растлумачылі, што для канца жніўня і верасня такія паводзіны ваўкоў — звычайная з'ява, паколькі ваўчыца павінна вучыць паляванню маладняк, а хатнія жывёлы найбольш падыходзяць для гэтага.
Паводле дадзеных арганізацыі, сёлета светлагорскія паляўнічыя ўжо здабылі 11 ваўкоў. Пры гэтым спецыялісты канстатуюць, што колькасць драпежнікаў з кожным годам у раёне павялічваецца праз іх міграцыю з Палескага радыяцыйнага запаведніка.
Пры гэтым у БТПР адзначылі, што ваўкі не ўяўляюць небяспекі для людзей, у прыватнасці грыбнікоў, паколькі напады на чалавека у лесе адбываюцца толькі ў выключных выпадках.
