Вечарыны "На восеньскай мяжы" пройдуць у літаратурным музеі

© PixabayАпалае лісце
Апалае лісце - Sputnik Беларусь
Падпісацца
Імпрэза праекта "ЛіТэАрт" будзе прысвечана 110-годдзю Алеся Звонака, 115-годдзю Язэпа Пушчы і прэзентацыі кнігі дакументальных аповесцей "19 лет" Сяргея Грахоўскага.

МІНСК, 3 ліс — Sputnik. Сёлета адзначаюцца юбілеі Язэпа Пушчы і Алеся Звонака — ахвяр жахлівых палітычных рэпрэсій, якія вымушаны былі не толькі адбываць пакаранне за тое, чаго не рабілі, але вярнуцца на радзіму толькі праз доўгія гады.

Падчас імпрэзы будзе прэзентавана кніга пісьменніка Сяргея Грахоўскага "19 лет" — дакументальныя аповесці аўтабіяграфічнага зместу, у якіх аўтар узгадвае сваё жыццё ў лагерах і ссылках, у якіх пісьменнік правёў 19 гадоў. Сяргей Грахоўскі лічыў сваім галоўным абавязкам расказаць пра свой час, сваіх сучаснікаў, сяброў, якія назаўжды засталіся маладымі.

Кнігі на паліцы, архіўнае фота - Sputnik Беларусь
Літаратурны фестываль "Знак роўнасці" пройдзе 17-19 лістапада ў Мінску

Праект "ЛіТэАрт" — цікавае спалучэнне літаратуры і тэатра, калі Слова ператвараецца ў Дзеянне. Тэатр і літаратура — адны з тых відаў мастацтва, якія найбольш уражваюць. Дзяржаўны музей гісторыі беларускай літаратуры і народны літаратурны тэатр "Жывое слова" пад кіраўніцтвам Алесі Сівохінай і Алеся Мойскага вырашылі аб'яднаць прыгажосць беларускага пісьменства і талент пачынаючых актораў у сценах музея.

Пра постаці творцаў і іх літаратурныя шляхі распавядуць Кастусь Цвірка, Лідзія Савік, Віктар Жыбуль, Уладзімір Арлоў. Прэзентуе кнігу аповесцей "19 лет" дачка пісьменніка — Таццяна Сяргееўна Грахоўская. 

Мерапрыемства пройдзе 9 лістапада ў Дзяржаўным музеі гісторыі беларускай літаратуры (вул. Багдановіча, 13); пачатак а 17-й гадзіне. 

Стужка навiн
0