МІНСК, 10 ліс — Sputnik. Памёр вядомы сатырык Міхаіл Задорнаў. "Пісьменнік і сатырык Міхаіл Задорнаў памёр на 70-м годзе жыцця", — паведаміў у пятніцу сайт газеты "Известия".
Пазней інфармацыю пра смерць сатырыка пацвердзілі Рэгіна Дубавіцкая і Іосіф Кабзон, а мэр Масквы Сяргей Сабянін выказаў спачуванні блізкім Міхаіла Задорнава.
Михаил Задорнов был незаурядным артистом и остроумным хроникером эпохи. Соболезную родным и близким сатирика
— Сергей Собянин (@MosSobyanin) 10 ноября 2017 г.
Доўгі час сатырык пакутаваў ад анкалагічнага захворвання — у яго была пухліна галаўнога мозгу. У 2016 годзе ён быў праапераваны ў Германіі і прайшоў курс хіміятэрапіі, пасля чаго стаў адчуваць сябе прыкметна лепш. Але неўзабаве хвароба вярнулася.
Улетку стала вядома, што пісьменнік адмовіўся ад знясільваючага лячэння, каб правесці апошнія дні ў коле сям'і.
Задорнаў нарадзіўся ў Латвіі ў 1948 годзе ў сям'і савецкага пісьменніка. Пачаў публікаваць гумарыстычныя апавяданні ў 1974 годзе, пазней стаў пісаць маналогі для эстрадных артыстаў, з канца 1980-х пачаў сам выконваць свае творы са сцэны.
Сыграў некалькі роляў у кіно. Набыў шырокую вядомасць дзякуючы сатырычным канцэртам, якія трансляваліся па тэлебачанні.
