МІНСК, 16 ліс — Sputnik. Новых акадэмікаў і членаў-карэспандэнтаў выберуць у чацвер на сесіі Агульнага сходу Нацыянальнай акадэміі навук (НАН) Беларусі, паведамілі Sputnik у прэс-службе ўстановы.
Аддзялення НАН ужо правялі абмеркаванні і галасаванні за вылучаных кандыдатаў на вакантныя месцы. Пасля зацвярджэння сесіяй Акадэміі навук у Беларусі афіцыйна з'явяцца новыя акадэмікі і члены-карэспандэнты.
Зараз у НАН ёсць шэраг вакансій. Так, існуюць месцы для акадэмікаў у сферы оптыкі, матэрыялазнаўства, гісторыі Беларусі, беларускай мовы, аграпрамысловай хіміі і іншых.
Членаў-карэспандэнтаў будуць выбіраць па спецыяльнасцях археалогія, транспланталогія, генетыка, машынабудаванне, квантавая оптыка, агульнае земляробства і іншых. Вядомыя ўжо і кандыдаты на гэтыя пасады. Так, членам-карэспандэнтам НАН, хутчэй за ўсё, стане Алег Румо — вядомы лекар-трансплантолаг і сенатар. Па спецыяльнасці "археалогія" пост можа дастацца дэпутату Палаты прадстаўнікоў Ігару Марзалюку. Членам-карэспандэнтам па "інфармацыйных тэхналогіях" можа стаць экс-міністр адукацыі Міхаіл Жураўкоў.
Па шэрагу аддзяленняў конкурсу на вакансіі няма — там па аднаму кандыдату. Па некаторых жа — напрыклад, па культуралогіі, — колькасць прэтэндэнтаў дасягае васьмі чалавек.
Мяркуецца, што пасля выбараў членаў-карэспандэнтаў і акадэмікаў усе вакансіі будуць зачыненыя. Вынікі іх стануць вядомыя ўжо ўдзень у чацвер.
