МІНСК, 20 сту — Sputnik, Іна Грышук. Маштабны цыркавы форум, які аб'яднае лепшых цыркавых артыстаў і акрабатаў з усяго свету, пачнуць праводзіць у Гомелі, першы такі фэст пройдзе ў пачатку верасня гэтага года і з часам стане візітоўкай Беларусі.
"Ідал" прапішуць у Гомелі
Праект "Ідал Беларусь" плануецца праводзіць у рамках аднаго з самых вядомых міжнародных фестываляў свету "Ідал", які з 2013 года праходзіць у Маскве ў Вялікім Маскоўскім цырку. За такі кароткі час праект паспеў атрымаць прызнанне міжнародных экспертаў у галіне сусветнага цыркавога мастацтва.
У Беларусі пляцоўкай для міжнароднага цыркавога форума стане Гомельскі дзяржаўны цырк. Гомель абралі невыпадкова. У гэтым абласным цэнтры пакуль не праводзяцца такія флагманскія мерапрыемствы, як "Славянскі базар у Віцебску" ці Фестываль нацыянальных культур у Гродне. Арганізатарамі фестываля будуць Міністэрства культуры Беларусі, а таксама Вялікі Маскоўскі цырк.
Форум аб'яднае артыстаў з усяго свету, самыя лепшыя атракцыёны прыедуць у Беларусь, пераможцаў сярод якіх будзе вызначаць міжнароднае журы. Склад артыстаў пакуль не вызначаны, але вядома, што вядучымі на фестывалі будуць браты Запашныя і запрошаная зорка.
Ідэю прапанавалі браты Запашныя
Ідэю правесці буйны цыркавы форум у Беларусі ініцыяваў Народны артыст Расіі, дырэктар Вялікага Маскоўскага цырка Эдгард Запашны. Вядома, што браты Запашныя з'яўляюцца заснавальнікамі і асноўнымі прадзюсарамі расійскага фестываля "Ідал".
Як паведаміла памочнік Эдгарда Запашнага Вікторыя Урбановіч, ініцыятыву падтрымаў Надзвычайны і Паўнамоцны Пасол Расіі ў Беларусі Аляксандр Сурыкаў, а таксама міністр культуры Беларусі Юрый Бондар. Прывітальны адрас у сувязі са стартам праекта быў атрыманы ад старшыні пастаяннай камісіі Савета Рэспублікі Нацыянальнага сходу Рэспублікі Беларусь па адукацыі, навуцы, культуры і сацыяльным развіцці Ірыны Старавойтавай.
Беларускі і расійскі бакі ўжо абмеркавалі шэраг арганізацыйных пытанняў па правядзенні фестывалю ў межах сустрэчы, якая адбылася ў Пасольстве Расійскай Федэрацыі ў Мінску.
Фэст стане візітоўкай краіны
Міністр культуры Бондар упэўнены, што фестываль стане інтэграцыйнай пляцоўкай, дзейнасць якой будзе накіраваная на развіццё міжкультурнага абмену паміж краінамі СНД, падтрыманне агульнанацыянальных каштоўнасцяў і традыцый. У якасці запрошаных гасцей у фестывалі "Ідал Беларусь" будуць удзельнічаць міжнародныя эксперты з такіх краін, як Іспанія, Італія, Германія, Францыя, Мексіка, Кітай, Канада, Манголія, Казахстан. Бондар адзначыў, што гэта дасць магчымасць паказаць дасягненні культур Расіі і Беларусі на міжнародным узроўні.
Паводле слоў Народнага артыста Расіі Эдгарда Запашнага, падобны праект стане фестывальнай візітоўкай краіны, умацуе міжнароднае супрацоўніцтва, дасць дадатковы імпульс развіццю турыстычнай актыўнасці рэгіёна, а таксама магчымасць таленавітай цыркавой моладзі Беларусі дэманстраваць свае магчымасці разам з артыстамі сусветнага экстра-класа.
