МІНСК, 6 мая — Sputnik. Расійскі акцёр і мастацкі кіраўнік Тэатральнага інстытута імя Шчукіна Уладзімір Этуш у нядзелю адзначае дзень нараджэння.
Этуш нарадзіўся ў Маскве 6 мая 1922 года. Аднак у яго пашпарце годам нараджэння напісаны 1923-ты.
Свае "неафіцыйныя" 95 гадоў акцёр адзначаў у маі мінулага года. Зараз Этуш святкуе "афіцыйны" юбілей.
З днём нараджэння артыста павіншаваў прэзідэнт Расіі Уладзімір Пуцін. Тэкст віншавальнай тэлеграмы быў апублікаваны на сайце Крамля.
"Паважаны Уладзімір Абрамовіч! Прыміце віншаванні з днём нараджэння. Вас — выдатнага артыста, яркага прадстаўніка легендарнай "Вахтангаўскай" школы — шчыра любяць мільёны людзей у нашай краіне", — гаворыцца ў паведамленні.
Дэбют акцёра ў кіно адбыўся ў 1953 годзе. Тады Уладзімір Этуш сыграў у карціне Міхаіла Ромма "Адмірал Ушакоў".
Усяго артыст зняўся больш чым у 150 фільмах. Найбольшую вядомасць яму прынеслі камедыйныя ролі ў фільмах Леаніда Гайдая "Каўказская палонніца", "12 стульяў" і "Іван Васільевіч мяняе прафесію".
Уладзімір Этуш з'яўляецца лаўрэатам Дзяржаўнай прэміі РФ у галіне літаратуры і мастацтва 2001 года. Ён узнагароджаны тэатральнымі прэміямі "Крыштальная Турандот" (1994), "Кумір" (2000), "Зорка тэатрала" (2008, 2012, 2016).
