МІНСК, 24 мая — Sputnik. Беларускія кампаніі, якія працуюць з асабістай інфармацыяй аб грамадзянах Еўрасаюза, павінны будуць выконваць "Агульны рэгламент абароны персанальных дадзеных Еўрапейскага саюза", пра гэта заявіў кіруючы партнёр адвакацкага бюро "Леў, Шарстнёў і партнёры" Барыс Леў падчас тэлемосту Мінск-Ерэван-Кішынёў-Талін на тэму: "Закон ЕС аб абароне персанальных дадзеных — забарона на фатаграфію ў Еўропе?", які прайшоў у МПЦ Sputnik Беларусь.
"У цяперашні час беларускія кампаніі, якія працуюць з персанальнымі дадзенымі людзей з Еўрапейскага саюза, павінны дапрацоўваць свае прыстасаваныя пагадненні і ўводзіць элементы, якія прадугледжаны "Агульным рэгламентам абароны персанальных дадзеных Еўрапейскага саюза", які ўступіць у сілу 25 мая. Калі кампанія працуе з асабістымі дадзенымі грамадзян Еўрасаюза, то гэта неабходна рабіць да ўступлення ў сілу рэгламенту", — растлумачыў эксперт.
Паводле яго слоў, гэта закранае шырокі круг юрыдычных асоб, якія працуюць з асабістымі дадзенымі грамадзян ЕС. "Гаворка ідзе нават пра медыцынскія клінікі: калі яны працуюць з грамадзянамі ЕС, атрымліваюць іх асабістыя дадзеныя, то фактычна адбываецца іх апрацоўка, і, адпаведна, на гэта таксама трэба атрымліваць згоду дадзеных асобаў", — адзначыў Барыс Леў.
"Агульны рэгламент абароны персанальных дадзеных Еўрапейскага саюза" ўступіць у сілу 25 мая 2018 года. Ён тычыцца працы ўсіх кампаній, якія займаюцца зборам, апрацоўкай і захоўваннем персанальных дадзеных.
