МІНСК, 3 ліп — Sputnik. Кіеў гатовы разгледзець прапанову аб абмене арыштаванага ва Украіне журналіста Кірыла Вышынскага, заявіла першы віцэ-спікер Вярхоўнай рады Ірына Герашчанка.
Герашчанка напярэдадні назвала прозвішчы 23 грамадзян РФ, якіх у Кіеве гатовыя перадаць Расіі ў абмен на асуджаных украінцаў, аднак журналіста Вышынскага ў пераліку няма. Паводле слоў парламентарыя, яго да абмену не прапаноўвалі.
"Яна (Масква — Sputnik) павінна зрабіць адпаведную прапанову ўкраінскаму боку, і мы з задавальненнем яе разгледзім", — заявіла яна ў эфіры тэлеканала ICTV.
На сёння, як сцвярджае Герашчанка, прапаноў па абмене кіраўніка РІА "Новости Украина" не паступала.
Прэзідэнт Расіі Уладзімір Пуцін раней абмяркоўваў з украінскім калегам Пятром Парашэнкам пытанне выдачы затрыманых, уключаючы лёс кіраўніка партала Вышынскага. Згадвала аб абмене журналіста і ўпаўнаважаная па правах чалавека Таццяна Маскалькова.
Супрацоўнікі Службы бяспекі Украіны (СБУ) уварваліся ў офіс РІА "Новости Украина" 15 мая. У той жа дзень быў затрыманы кіраўнік партала Вышынскі — яго абвінавацілі ў дзяржаўнай здрадзе. Сёння журналіст застаецца пад арыштам.
Такія крокі ўкраінскіх сілавікоў асудзілі не толькі ў Расіі, але і многія журналісты Беларусі і краін Захаду. Каментаваў сітуацыю і Пуцін — па яго словах, Вышынскага арыштавалі "за яго прамую прафесійную дзейнасць, за ажыццяўленне яго журналісцкай функцыі". Неспакой арыштам выказвалі і ў АБСЕ, і ў міжнародных журналісцкіх арганізацыях.
