Ювелір Андрэй Жызнеўскі 3 ліпеня падарыў срэбную мадэль самалёта У-2 Віцебскаму абласному краязнаўчаму музею.
"Самым складаным у працы было прылітаваць дрот таўшчынёй 0,18 мікрон да вялікіх дэталяў. Гэта можа зрабіць не кожны майстар, нават высокага ўзроўню", — распавёў майстар на ўручэнні мадэлі самалёта.
Па словах Жызнеўскага, некалькі тыдняў ён спаў па некалькі гадзін у суткі, паколькі трэба было шмат чаго "давесці да розуму". Напрыклад, рэдкую зялёную паціну, якая з'яўляецца на метале толькі праз 100 гадоў ляжання ў зямлі, ювелір рабіў у апошнія ночы перад цырымоніяй уручэння самалёта.
"У стварэнні мадэлі я выкарыстаў тэхналогіі, якія вядомыя нямногім майстрам у свеце, таму я іх пакіну ў сакрэце", — дадаў ювелір.
На ўручэнні прысутнічалі прадстаўнікі Віцебскага аблвыканкама і гарвыканкама, якія адзначылі, што дзякуючы Жызнеўскаму аб віцебскай ювелірнай школе загавораць ва ўсёй Беларусі.
Інфармацыйнае агенцтва Sputnik Беларусь выступіла галоўным інфармацыйным партнёрам перадачы Віцебскаму абласному краязнаўчаму музею адзінай у свеце срэбнай мадэлі самалёта У-2, якую стварыў Андрэй Жызнеўскі.
