МІНСК, 15 сту - Sputnik. Беларускі тэнісіст Ілля Івашка змог прабіцца ў другі раўнд адкрытага чэмпіянату Аўстраліі па тэнісе - Australian Open. Турнір праходзіць у Мельбурне.
Івашка, які займае 84-ы радок у сусветным рэйтынгу, упершыню ў кар'еры трапіў у асноўную сетку Australian Open. У сваім стартавым паядынку беларус абыграў 43-ю ракетку свету - тэнісіста з Туніса Маліка Жазіры.
Першы сэт застаўся за прадстаўніком Туніса (4:6), аднак наступныя дзве партыі ўзяў беларус - 7:6 (8:6) і 6:1. Вёў Івашка і ў чацвёртым сэце (4:0), пасля гэтага Жазіры зняўся з матчу.
Наступны сапернік нашага тэнісіста вызначыцца ў паядынку паміж іспанцам Пабла Карэньё-Буста (23-ы нумар рэйтынгу) і італьянцам Лукой Ванні (163).
Тым часам былая першая ракетка планеты - наша суайчынніца Вікторыя Азаранка - у першым крузе жаночага адзіночнага разраду Australian Open пазмагаецца c прадстаўніцай Германіі Лаурай Зігемунд (110).
Азаранка зараз 53-я ў сусветным рэйтынгу. Беларуска двойчы святкавала поспех на гэтым турніры. Яна выйграла Australian Open у 2012-м і 2013 гадах.
