МІНСК, 2 сак - Sputnik. Нобелеўскі лаўрэат, акадэмік Жарэс Алфёраў памёр на 89-м годзе жыцця ў Пецярбургу, паведамляе РІА "Новости" ў суботу са спасылкай на яго жонку Тамару.
Нагадаем, 30 лістапада акадэмік быў шпіталізаваны ў Маскве з падазрэннем на інсульт. На пачатку снежня стала вядома, што стан здароўя Алфёрава палепшыўся. "Абсалютна нармальна ўсё. Ніякіх там няма праблем... Была там праблема, але яна была лакалізаваная", - паведаміў тады прэс-сакратар КПРФ Аляксандр Юшчанка.
Аднак у суботу, 2 сакавіка, жонка нобелеўскага лаўрэата паведаміла сумную навіну: "Жарэс Іванавіч памёр сёння".
Жарэс Алфёраў нарадзіўся 15 сакавіка 1930 года ў Віцебску. У 2000 годзе ён атрымаў Нобелеўскую прэмію па фізіцы за распрацоўку паўправадніковых гетэраструктур і стварэнне хуткіх опта- і мікраэлектронных кампанентаў. Гэтыя навуковыя адкрыцці ён зрабіў яшчэ на мяжы 60-70-х гадоў.
Алфёраў з'яўляецца ганаровым прафесарам Беларускага дзяржаўнага ўніверсітэта і мае дзве беларускія дзяржаўныя ўзнагароды - Ордэн Францыска Скарыны і Ордэн Дружбы.
Акрамя навукі Жарэс Алфёраў шмат увагі надаваў грамадскай дзейнасці, займаў пасады віцэ-прэзідэнта Расійскай акадэміі навук, дырэктара Фізіка-тэхнічнага інстытута імя А. Ф. Іофе.
