МІНСК, 4 чэр - Sputnik. У фан-зонах на II Еўрапейскіх гульнях заўзятары змогуць набыць толькі піва, моцны алкаголь там прадавацца не будзе, аб гэтым у аўторак паведаміў міністр унутраных спраў Ігар Шуневіч.
"У фан-сектарах, зонах адпачынку будзе прадавацца піва і не будзе моцнага алкаголю. Гэта агульнасусветная практыка, яна сябе апраўдвае", - цытуе кіраўніка МУС БелТА.
Шуневіч таксама запэўніў, што беларускія праваахоўнікі цалкам гатовыя да патоку заўзятараў і турыстаў, якія прыедуць у краіну падчас Еўрапейскіх гульняў-2019.
"Колькі б гасцей ні прыехала - чым больш, тым лепш - міліцыя справіцца са сваімі задачамі з пункту гледжання забеспячэння бяспекі, арганізацыі прапускнога рэжыму. З гэтым праблем не будзе", - паабяцаў міністр.
Нагадаем, II Еўрапейскія гульні пройдуць у Мінску з 21 па 30 чэрвеня. У іх возьмуць удзел больш за 4 тысячы спартсменаў з 50 краін, яны разыграюць 200 камплектаў узнагарод у 15 відах спорту. Чакаецца, што падчас спаборніцтваў Беларусь наведаюць не менш за 30 тысяч балельшчыкаў.
