МІНСК, 29 ліп - Sputnik. Беларусь і Расія не могуць дамовіцца аб параметрах адмены роўмінгу, бо ў Мінску не гатовыя да ўвядзення бясплатных уваходных для абанентаў, якія вандруюць, паведаміў журналістам кіраўнік Мінкамсувязі РФ Канстанцін Наскоў.
Беларусь і Расія плануюць вырашыць пытанне з адменай роўмінгу ўжо ў гэтым годзе - ва ўсякім выпадку, такія прагнозы рабіў кіраўнік Савета Рэспублікі Міхаіл Мясніковіч. Аднак, як высветлілася, паміж бакамі да гэтага часу ёсць супярэчнасці па пытанні.
"На жаль, мы з калегамі з Беларусі ніяк не можам прыйсці да агульнага назоўніка. Доўга вядзем перамовы, але не магу парадаваць вынікамі. У нейкі момант - паўгода таму - мне падалося, што мы дамовіліся, але цяпер пазыцыі ізноў дастаткова моцна адрозніваюцца", - сказаў Наскоў, яго словы прыводзіць РІА "Новости".
Як растлумачыў міністр, пазіцыі перш за ўсё адрозніваюцца ў разуменні таго, што такое роўмінг.
"У нашым разуменні адсутнасць роўмінгу - гэта бясплатныя ўваходныя званкі. Да гэтага мы дамовіцца з нашымі беларускімі калегамі не можам", - растлумачыў кіраўнік Мінкамсувязі, адзначыўшы, што беларускі бок не гатовы пайсці на бясплатныя ўваходныя.
Аб розніцы ў поглядах на адмену роўмінгу раней заяўлялі і найбуйнейшыя расійскія сотавыя аператары. Ідэі беларускіх удзельнікаў перамоў расійскія аператары называлі "нярыначнымі".
Пытанне аб адмене роўмінгу паміж краінамі ўздымалася неаднаразова. У канцы чэрвеня 2017 года абмяркоўвалася на пасяджэнні вышэйшага дзяржсавета Саюзнай дзяржавы Беларусі і Расіі.
У Расіі нацыянальны і ўнутрысеткавы роўмінг адменены з 1 чэрвеня 2019 года. На ўсе званкі, якія здзяйсняюцца ўнутры краіны, аператары абавязаныя ўсталёўваць адзіны тарыф.
