МІНСК, 16 ліс - Sputnik. Датэрміновае галасаванне на выбарах дэпутатаў Палаты прадстаўнікоў сёмага склікання завяршаецца ў Беларусі ў суботу 16 лістапада. Аддаць свой голас за кандыдатаў датэрмінова беларусы маглі з аўторка 12 лістапада ў працягу пяці дзён.
Прыйсці на выбарчыя ўчасткі можна з 10:00 да 14:00 і з 16:00 да 19:00.
Па ўсёй краіне створаны 5831 выбарчы ўчастак. Не праводзілася датэрміновае галасаванне толькі на тых, якія ўтвораны ў бальніцах, санаторыях, прафілакторыях, дамах адпачынку і ў іншых лячэбных установах, дзе пацыенты атрымліваюць медыцынскую дапамогу ва ўмовах стацыянара.
Удзельнічаць у датэрміновым галасаванні могуць тыя беларусы, якія ў асноўны дзень выбараў не будуць знаходзіцца па месцы свайго жыхарства. Ніякага афіцыйнага пацверджання немагчымасці прыйсці на выбарчы ўчастак у асноўны дзень выбараў не трэба.
У МУС адзначылі, што выбарчая кампанія ў Беларусі праходзіць спакойна.
Асноўны дзень галасавання на парламенцкіх выбарах у Беларусі - нядзеля, 17 лістапада.
Нагадаем, што ў Беларусі інстытут датэрміновага галасавання існаваў заўсёды. Па дадзеных ЦВК, у датэрміновым галасаванні бярэ ўдзел да 30% электарату, надзеленага правам выбарчага голасу. Пры гэтым у Беларусі, у адрозненне ад шэрагу суседніх краін, няма "дня цішыні", калі за суткі да асноўнага дня галасавання спыняецца агітацыя.
