МІНСК, 2 сак - Sputnik. Тры выпадкі каронавіруса пацверджана па стане на панядзелак 2 сакавіка ў Беларусі, паведаміла намеснік міністра аховы здароўя - галоўны дзяржаўны санітарны ўрач Наталля Жукава.
Аб першым выпадку каронавіруса новага тыпу COVID-19 у Беларусі стала вядома ў мінулую пятніцу. У выхадныя Міністэрства аховы здароўя паведаміла, што зафіксавана яшчэ двое хворых.
"У нас зарэгістравана тры выпадкі, гэта высокая ступень дакладнасці", - заявіла журналістам Жукава.
Пры гэтым намеснік кіраўніка Міністэрства аховы здароўя дадала, што прынята рашэнне аб накіраванні аналізаў у адну з рэферэнс-лабараторый Сусветнай арганізацыі аховы здароўя (СААЗ), каб пацвердзіць выпадак, які быў выяўлены беларускімі медыкамі.
"Сама практыка заключаецца ў тым, што накіроўваюцца як адмоўныя, так і станоўчыя вынікі. Хоць у працы нашых лабараторый мы ўпэўненыя", - патлумачыла намеснік міністра.
Па словах Жукавай, сёння аналізы правяраюць у некалькіх лабараторыях, а ў медыкаў - вялікі аб'ём працы для пошуку і абследавання кантактных асоб.
Яна дадала, што цяпер ведамства атрымлівае ўсё больш пытанняў, якім чынам можна абследавацца на прадмет каронавіруса.
"Тэма на слыху і выклікае пэўныя сумненні, але ўвесь той парадак абследавання эпідэміялагічна абгрунтаваны і адказвае выкліку часу і той сітуацыі, якая назіраецца ў Беларусі", - падкрэсліла Жукава.
Намеснік кіраўніка Міністэрства аховы здароўя адзначыла: у першую чаргу праверыць неабходна тых, хто наведаў краіны з неспрыяльнай эпідэміялагічнай абстаноўкай, меў блізкія кантакты з хворымі ці тых, людзей з сімптомамі, якія не выключаюць інфекцыю.
У сваю чаргу загадчык кафедры інфекцыйных хвароб Беларускага дзяржаўнага медыцынскага ўніверсітэта Ігар Карпаў ў рамках брыфінгу заклікаў "далікатна ставіцца" да пацыентаў, у якіх дыягнаставаны каронавірус. Паводле яго слоў, некаторыя любяць публічнасць, іншыя не хацелі б лішняй ўвагі.
