МІНСК, 25 сту — Sputnik. Ліміт у 22 еўра на бяспошлінныя пасылкі ў Беларусі ў бліжэйшы час павялічаны не будзе, паведаміў начальнік галоўнага ўпраўлення арганізацыі мытнага кантролю Дзяржаўнага мытнага камітэта Беларусі Дзмітрый Кавалёнак.
"Пытанне паштовых адпраўленняў знаходзіцца ў ДМК на пастаянным кантролі. Мы актыўна ўдзельнічаем у перамовах з дзяржавамі-членамі ЕАЭС, у рамках Сусветнай мытнай арганізацыі. У цяперашні час дзеючы ліміт захоўваецца. У Беларусі ў бліжэйшы час якіх-небудзь зменаў не чакаецца, але як толькі набудзе сілу рашэнне савета ЕЭК, у нас будзе магчымасць нешта змяняць", — распавёў Дзмітрый Кавалёнак.
Паводле яго слоў, аб'ём пасылак з моманту прыняцця нормы для бяспошлінных пасылак, не паменшыўся, але спынілася тэндэнцыя масавага ўвозу тавараў.
"У 2015 годзе каля 400 чалавек атрымлівалі больш за 900 пасылак у год. Зараз гэтая лічба ў шэсць разоў паменшылася, і мы ўвесь час маніторым такіх людзей, яны пад кантролем і ў мытных, і ў падатковых органаў", — адзначыў прадстаўнік ДМК.
Дзмітрый Кавалёнак таксама распавёў, што як толькі ліміт на бяспошлінныя пасылкі ў 22 еўра быў уведзены, паступленні ў бюджэт павялічыліся. Напрыклад, за 2017 год 3,7 мільёна беларускіх рублёў паступілі ад мытных плацяжоў фізічных асоб.
Старшыня ДМК Беларусі Юрый Сянько таксама падкрэсліў, што пытанне павелічэння ліміту тычыцца не толькі яго ведамства і носіць комплексны характар.
"Рашэнне павінна прымаць і міністэрства антыманапольнага рэгулявання і гандлю. І ў цэлым трэба глядзець, як гэта паўплывае на эканоміку нашай краіны. Задача ДМК — паказаць камерцыйныя партыі тавараў, з гэтым мы спраўляемся", — заявіў ён.