Каманда Нацыянальнага акадэмічнага тэатра імя Янкі Купалы абяцае гледачам прадставіць нечаканую версію класічнага твора. Спецыяльна для пастаноўкі Марыя Пушкіна пераклала п'есу Гогаля на трасянку, а над сцэнаграфіяй папрацаваў літоўскі тэатральны мастак Марыус Яцкоўскіс, якога беларуская публіка ўжо ведае па чэхаўскай "Чайцы".
Мастацкі кіраўнік тэатра Мікалай Пінігін растлумачыў, што спектакль стаў курсавой працай яго вучня — рэжысёра Дзмітрыя Цішко. Выбар спыніўся на "Рэвізоры" не выпадкова — п'еса застаецца актуальнай ва ўсе часы.
"Класіка называецца так не таму, што гэта вырашылі настаўнікі мовы і літаратуры. Класіка — гэта рэчы, правераныя часам, і калі твор названы класічным, значыць, аўтар зачапіў рэчы, якія не змяняюцца", — адзначыў Мікалай Пінігін.
Па словах рэжысёра, у пастаноўцы занятая амаль уся мужчынская частка трупы. Жыхароў павятовага горада на беларускай сцэне прадставяць Віктар Манаеў, Міхаіл Зуй, Павел Харланчук-Южакоў, Сяргей Чуб, Зоя Белахвосцік, Кацярына Алейнікава, Дзіяна Камінская і іншыя зоркі тэатра.