У чацвер у Нацыянальнай школе прыгажосці прайшоў паказ-прэзентацыя калекцый адзення "Погляд у будучыню. Новыя магчымасці лёгкай прамысловасці Беларусі".
Свой погляд на моду і дызайн у калекцыях прадставілі вядучыя беларускія прадпрыемствы лёгкай прамысловасці: "Баранавіцкае вытворчае баваўнянае аб'яднанне", "Аршанскі ільнокамбінат", "Цэнтр моды", "БелКрэда", "Калінка", "Элод", "Камінтэрн", "Жлобінская швейная фабрыка". Таксама былі прадэманстраваныя калекцыі адзення французскага дызайнера з беларускімі каранямі Юрыя Ката і дызайнера-кансультанта канцэрна "Беллегпрам" Людмілы Лабковай.
Работы беларускіх дызайнераў аднымі з першых убачылі кіраўнік адміністрацыі прэзідэнта Наталля Качанава, старшыня канцэрна "Беллегпрам" Мікалай Яфімчык, кіраўнікі тэкстыльных і швейных прадпрыемстваў Беларусі, дызайнеры.
Па словах Яфімчыка, асноўная задача мерапрыемства — не прэзентацыя модных тэндэнцый, а працоўны паказ.
"Тут мы планавалі ў першую чаргу сабраць усіх асноўных прадстаўнікоў рынку і абмеркаваць праблемныя пытанні і перспектывы працы. У нас таксама адбылося закрытае абмеркаванне праблемных момантаў у вузкім коле", — растлумачыў ён.
Старшыня канцэрна адзначыў, што "беларуская лёгкая прамысловасць зрабіла значны крок наперад".
"У прыватнасці калекцыя Людмілы Лабковай толькі што вярнулася з Мілана. Гэта сведчыць аб тым, што беларускія ідэі цікавыя ў Італіі. Перспектывы ў нашай прадукцыі вельмі добрыя. Якасць тканіны высокая. Нашы прадпрыемствы ўмеюць з ёй працаваць. Дэталі некаторых з прадстаўленых узораў неўзабаве будуць выкарыстоўвацца ў прамысловых калекцыях. У дадзеным паказе былі напрацоўкі, якія абсалютна новыя і ніколі раней не выпускаліся. Па кошце мы таксама канкурэнтаздольныя", — рэзюмаваў Яфімчык.
Праект па стварэнні ільняных джынсаў атрымаў свой старт яшчэ ў мінулым годзе, а ўжо ў 2018-м джынсы з'явяцца на паліцах сталічных і рэгіянальных магазінаў.
"У 2017 годзе мы рэалізавалі частку праграмы, працуючы з беларуска-турэцкім прадпрыемствам, якое знаходзіцца ў Кобрыне. Гэтая кампанія выпускала досыць вялікую калекцыю ільнянога адзення, уключаючы джынсы. Мы ажыццяўлялі продаж як праз іх гандлёвую сетку, так і праз уласную", — распавёў Sputnik начальнік упраўлення распрацоўкі асартыменту і рэкламы прадукцыі Аршанскага ільнокамбіната Ігар Ешчанка.
Паводле яго слоў, у гэтым годзе ільнокамбінат плануе не толькі пашырыць вытворчасць джынсавай тканіны з лёну, але і павялічыць вытворчасць вырабаў з яе па давальніцкай схеме.