У калекцыі прадстаўленыя амаль усе віды традыцыйнага народнага мастацтва Беларусі — кераміка, іканапіс, разьба па дрэве, мастацкі метал і іншыя.
"Прадстаўлены збор — гэта спадарожныя вынікі маёй працы, якая доўжылася амаль паўсотні гадоў. Асабліва актыўнымі паездкі былі ў савецкія гады, калі было больш транспартных магчымасцяў. Я спецыяльна ездзіў па майстрах старэйшага пакалення, якія кідалі сваё рамяство, таму спяшаўся занатаваць хоць штосьці і, калі гэта было магчыма, выратаваць некаторыя рэчы", — распавёў уладальнік калекцыі, першы доктар мастацтвазнаўства ў галіне народнага мастацтва Яўген Сахута.
Вялікую гістарычную і культурную значнасць маюць абразы на шкле, якія з'яўляюцца спецыфічным прыкладам больш позняга народнага мастацтва (традыцыя з'явілася толькі ў пачатку ХХ стагоддзя і доўга не праіснавала). У Нацыянальным гістарычным музеі Рэспублікі Беларусь дадзены роспіс на шкле на рэлігійную тэму будзе прадстаўлены ўпершыню.