МІНСК, 20 сак — Sputnik. Беларускія спартсмены-паралімпійцы вярнуліся ў Мінск, самалёт, якім наша дэлегацыя прыляцела з Пхенчхана, прызямліўся ў Нацыянальным аэрапорце ў ноч на аўторак.
Нягледзячы на позні прылёт, зала паветранай гавані поўная тых, хто сустракаў спартсменаў. Сярод іх заўзятары, сваякі, прадстаўнікі Мінспорту, шматлікія журналісты, а таксама аркестр, у якім пад кіраўніцтвам свайго бацькі грае адзін з паралімпійцаў — Юрый Голуб. Бацькі спартсменаў распавялі, што глядзелі ўсе спаборніцтвы з удзелам сваіх дзяцей, нягледзячы на тое, што ім даводзілася прачынацца ў чатыры раніцы.
Святлана Саханенка прысвяціла перамогу трэнеру і прызналася, што сумавала па хатняй ежы, а Юрый Голуб сказаў, што залаты медаль прысвячае бацькам.
Паралімпіяда праходзіла ў паўднёвакарэйскім Пхенчхане з 9 па 18 сакавіка. Зборная Беларусі заняла на Гульнях восьмы радок у агульным медальным заліку. Беларускія спартыўныя чыноўнікі разлічвалі на пяць медалёў, ужо такая колькасць узнагарод дазволіла б лічыць выступленне спартсменаў паспяховым. Аднак атлеты перасягнулі чаканні і заваявалі 12 узнагарод: па чатыры золата, срэбра і бронзы. Гэты вынік можна назваць ашаламляльным, асабліва з улікам таго, што на Паралімпіядзе Беларусь прадстаўлялі 15 спартсменаў у двух відах спорту: лыжным і біятлоне.
Часцей, чым іншыя беларусы, на паралімпійскі п'едэстал у Пхенчхане падымаліся лыжнікі Святлана Саханенка і Юры Голуб. Саханенка стала трохразовай паралімпійскай чэмпіёнкай. Юрый Голуб прынёс у скарбонку зборнай Беларусі на Паралімпіадзе ў Пхенчхане чатыры медалі.
Яркай падзеяй стаў і бронзавы медаль беларускай спартсменкі Лідзіі Графеевай у біятлоне на дыстанцыі 12,5 кіламетраў для атлетаў з парушэннем апорна-рухальнага апарата.