МІНСК, 22 сак — Sputnik. Карта госця горада Мінска з красавіка будзе прадстаўлена ў пяці фарматах — VIP, прэміум, люкс, бізнес і эканом, паведамляецца на сайце УП "Мінгардаведка".
Новыя фарматы прадугледжваюць 16 тыпаў карт рознага цэнавага дыяпазону. Па словах прадстаўнікоў Мінгардаведка, карты аптымізаваныя для розных груп спажыўцоў на аснове навуковых даследаванняў.
"Мы спадзяемся, што гэта дазволіць усім аматарам падарожжаў і людзям, якія цікавяцца гісторыяй нашай краіны, атрымаць унікальную магчымасць аптымальна спланаваць маршруты азнаямлення з выдатнымі мясцінамі нашага горада і яго ваколіц з максімальнай выгадай для свайго бюджэту", — падкрэслілі на прадпрыемстве.
Разам з картай госця пакупнік атрымлівае даведнік. Карта госця прадастаўляе права аднаразовага наведвання (бясплатна або са зніжкай) музеяў і экскурсій, мастацкіх галерэй, уключаных у праграму, а таксама заапарка, аквапарку, назіральнай пляцоўкі Нацыянальнай бібліятэкі Беларусі.
Акрамя ўсяго іншага, карта з'яўляецца электронным праязным білетам для аплаты паездак на гарадскім транспарце і дае права на 10 паездак на метро, а таксама на працягу тэрміну, пазначанага на карце, права безлімітнага праезду на аўтобусе, тралейбусе, трамваі.
Жадаючыя скарыстацца новай паслугай могуць аформіць карту анлайн на афіцыйным сайце праекта. Таксама яе можна купіць у павільёнах па продажы сувеніраў УП "Мінгардаведка" на пл. Свабоды, 2а, пл. Прывакзальнай, 5 і вул. Рэвалюцыйнай, 13.
Напярэдадні Еўрагульняў-2019 распрацуюць тэматычную карту з аб'ектамі, цікавымі для спартсменаў і балельшчыкаў.