У гэтыя выхадныя на "Чыжоўка-Арэне" прайшлі рэспубліканскія спаборніцтвы "Адкрытыя Чэмпіянаты і Першынства па спартыўных бальных танцах".
За прызавыя месцы ўдзельнікі сапернічалі ў чатырох катэгорыях — дзеці, юніёры, моладзь і дарослыя. Па рашэнні Прэзідыума СОО "БРТС" каманда з васьмі танцавальных пар, якая сфарміравалася па выніках спаборніцтваў 24-25 сакавіка, прадставіць нашу краіну ў камандных спаборніцтвах на German Open Dance Festival Mannheim 16-17 чэрвеня 2018 года.
Міжнароднае журы ацэньвала спартсменаў у рэжыме рэальнага часу, а ўсе вынікі адразу выводзіліся на экран. Конкурсная праграма ўключала ў сябе стандарт (вальс, танга, венскі вальс, павольны факстрот, квікстэп) і лаціну. Усяго ў чэмпіянаце і першынстве прымалі ўдзел больш за 1200 танцораў.
Традыцыйна ацэньваліся не толькі харэаграфічнае майстэрства, але і мова эмоцый, уменне паказаць сябе з дапамогай танца. Таксама важную ролю адыгрываў знешні выгляд спартсменаў: сукенкі з аборкамі, стразамі і бліскаўкамі, прычоскі незвычайных формаў і багацце лаку, яркі макіяж і туфлі на ўстойлівым абцасе — усё гэта абавязковыя і прывабныя для вачэй гледачоў атрыбуты спартыўнага танца.
Шматлікія каманды прыйшлі са сваёй групай падтрымкі, падбадзёрваць іх крыкамі і апладысментамі не забаранялася.
Таксама любая пара мела магчымасць зачараваць суддзяў і паказаць сваю індывідуальнасць у кароткім танцы-візітоўцы перад асноўнай конкурснай праграмай у кожнай катэгорыі.