Прадстаўнікі нацыянальных алімпійскіх камітэтаў праінспектавалі падрыхтоўку сталіцы і, у прыватнасці, стадыёна "Дынама" да Еўрапейскіх гульняў 2019 года.
Праца па рэканструкцыі аб'екта ідзе поўным ходам: асноўныя будаўнічыя работы ўжо завершаныя, засталося аздабленне, мантаж брыля і добраўпарадкаванне тэрыторыі.
Стадыён "Дынама" — адзін з яркіх сімвалаў Мінска. Пабудаваны ў 1930-х, стадыён быў разбураны падчас Другой сусветнай вайны і адбудаваны нанова. Цяпер ён перажывае яшчэ адно адраджэнне.
Рэканструкцыя была вымушанай, бо тэхнічны стан стадыёна ствараў рэальную пагрозу для бяспекі спартсменаў і гледачоў. Пасля яе завяршэння на "Дынама" будзе крыху больш за 20 тысяч глядацкіх месцаў. Пры гэтым з'явяцца спецыяльныя месцы для людзей на інвалідных калясках, а таксама месцы са столікамі для журналістаў. Будзе добраўпарадкавана 108 каментатарскіх кабінак.
На стадыёне ўжо ўсталяваныя чатыры асвятляльныя мачты з 394 святлодыёднымі пражэктарамі. Будуць устаноўлены два відэатабло 20×10 і 14×7 метраў.
На самім стадыёне зробяць бегавыя дарожкі, уладкуюць сектары для кідання дыска, молата, дзіды і штурхання ядра, пляцоўкі для скачкоў у даўжыню і вышыню, трайнога скачку і скачкоў з шастом. Для футбалістаў будзе поле з натуральным пакрыццём, для альпіністаў — крыты скаладром.
Менавіта тут 21 чэрвеня 2019 года адбудзецца адкрыццё II Еўрапейскіх гульняў і пройдуць шматлікія спаборніцтвы турніру.