Іспыты ў беларускіх гімназіях у новым навучальным годзе захаваюцца, але толькі ў старэйшых класах. Для паступлення на вольныя месцы ў дзесятыя і адзінаццатыя класы гімназій вучням трэба будзе здаваць два экзамены, адпаведнае рашэнне прыняло Міністэрства адукацыі Беларусі.
Раней у пачатку 2018 года прэзідэнт Беларусі Аляксандр Лукашэнка адмяніў уступныя экзамены ў пятыя класы гімназій, цяпер вучняў туды будуць набіраць у адпаведнасці з прапіскай.
Настаўнік вышэйшай катэгорыі, уладальнік адукацыйнага цэнтра, вядомы рэпетытар Яўген Лівянт асцерагаецца, што беларускія гімназіі на пераходным этапе могуць апынуцца ў сітуацыі хаосу. Свае асцярогі суразмоўца радыё Sputnik Беларусь тлумачыць наступным чынам:
"Я часта прыводжу ў прыклад 29-ю гімназію — адну з лепшых у Мінску. Восем чацвёртых класаў і чатыры пятых. Зараз зразумела, што ўсе пойдуць у пяты клас. І як будуць адбіраць, калі адбор забаронены? Значыць, непазбежнае ўвядзенне другой змены, таму што школа не гумавая. Але другая змена ў гімназіях забароненая Кодэксам аб адукацыі, а пятым класам нормамі СанПіНу забаронена вучыцца ў другую змену. Як гэта будзе рэгулявацца — настаўнікі, дырэктары, завучы і бацькі спрачаюцца паміж сабой. Гэта проста бурлівы кацёл, і накрыўку, я думаю, сарве бліжэй да чэрвеня", — распавядае Лівянт.
Па словах рэпетытара, адказнасць за вырашэнне сітуацыі з пераходам вучняў з 4-х у 5-я класы ўскладзена на дырэктараў адукацыйных устаноў і адміністрацыі раёнаў.
"Яны таксама не ведаюць, што з гэтым рабіць. І думаю, што ў канцы мая — пачатку чэрвеня нас чакае велізарная колькасць канфліктаў у кожнай гімназіі, і чым лепш гімназія, тым іх будзе больш", — адзначае рэпетытар.
Поўную версію размовы з вядомым рэпетытарам Яўгенам Лівянтам слухайце на радыё Sputnik Беларусь.