Каталіцкі свет сёння адзначае галоўнае свята хрысціянскага рэлігійнага календара — Светлае Хрыстова Уваскрасенне. Напярэдадні ва ўсіх каталіцкіх храмах Беларусі прайшлі святочныя велікодныя службы.
Парафія святых апосталаў Пятра і Паўла ў Барунах Ашмянскага раёна заснаваная ў 1715 годзе, хоць касцёл пабудаваны 1695 г. Зараз у гэту калісці шматлікую парафію ўваходзіць больш за дзесятак вёсак і вернікі з Смаргонскага і Ашмянскага раёнаў.
Сёння барунскі касцёл не мае ўласнага святара, таму на набажэнства прыяжджае пробашч Юрый з мястэчка Крэва.
Асвячэнне праводзяць у Вялікую Суботу. Ксяндзу Юрыю трэба аб’ехаць каля 12 месцаў, каб сутрэцца з вернікамі. Такая практыка існуе не ва ўсіх парафіях. Хутчэй за ўсё гэта традыцыя склалася праз тое, што вёскі вельмі раскіданыя і аддаленыя ад касцёла ў Барунах, і аўтобусы ўжо даўно не ходзяць так, як колісь. Да прыкладу ва ўласнай парафіі ў мястэчку Крэва ксёндз Юрый не ездзіць па суседніх вёсках.