МІНСК, 2 кра — Sputnik. Старшыня Вышэйшага дзяржаўнага савета Саюзнай дзяржавы, прэзідэнт Беларусі Аляксандр Лукашэнка павіншаваў з Днём яднання народаў Беларусі і Расіі прэзідэнта Расіі Уладзіміра Пуціна, паведамляе прэс-служба беларускага прэзідэнта.
"За гады сумеснага будаўніцтва мы дасягнулі значных вынікаў, эфектыўна вырашаючы ключавыя задачы двухбаковага супрацоўніцтва. Сёння Саюзная дзяржава з'яўляецца прыкладам паспяховай інтэграцыі для ўсёй еўразійскай прасторы", — адзначаецца ў віншаванні.
Пры гэтым, як адзначыў Лукашэнка, сучасныя рэаліі ставяць перад дзяржавамі новыя маштабныя мэты.
"Перакананы, што з дапамогай узгодненай стратэгіі мы зможам ажыццявіць намечаныя праекты і працягнем плённую працу ў імя працвітання дзвюх краін", — падкрэсліў кіраўнік дзяржавы.
Віншаванні з Днём яднання ад імя Лукашэнкі былі таксама накіраваны старшыні Савета Міністраў Саюзнай дзяржавы, старшыні ўрада Расіі Дзмітрыю Мядзведзеву, старшыні Савета Федэрацыі Федэральнага сходу Расіі Валянціне Мацвіенка, старшыні Дзяржаўнай Думы Федэральнага сходу Расіі Вячаславу Валодзіну, Патрыярху Маскоўскаму і ўсяе Русі Кірылу, дзяржаўнаму сакратару Саюзнай дзяржавы Рыгору Рапоце, старшыні Цэнтральнага камітэта Камуністычнай партыі Расіі Генадзю Зюганаву.
Дзень яднання народаў Расіі і Беларусі адзначаецца 2 красавіка. У гэты дзень у 1996 годзе прэзідэнты дзвюх краін Барыс Ельцын і Аляксандр Лукашэнка падпісалі ў Маскве дагавор "Аб стварэнні Супольнасці Расіі і Беларусі". Праз год у гэты ж дзень быў падпісаны дагавор "Аб Саюзе Беларусі і Расіі". Статут Саюза быў прыняты 23 мая 1997 года, а дэкларацыя "Аб далейшым яднанні Расіі і Беларусі" падпісана кіраўнікамі дзяржаў 25 снежня 1998 года.