МІНСК, 19 кра — Sputnik. Чэмпіёнка свету і Еўропы беларуская лёгкаатлетка Марына Арзамасава чакае другое дзіця, паведамляе Sputnik.
"З нецярпеннем і любоўю чакаем наша другое дзіцятка!" — напісала спартсменка ў Facebook.
Пазней у Instagram Арзамасава дадала, што рыхтуецца "да важнейшага старту ў сваім жыцці". "Мы ўсе з нецярпеннем чакаем нашага малодшага Арзамасіка і ўжо ў пашыраным складзе будзем рыхтавацца да Токіа-2020", — сказала лёгкаатлетка.
Арзамасава падкрэсліла, што самае галоўнае ў жыцці — гэта сям'я і дзеці. "А ўсё астатняе прыкладзецца", — сказала на заканчэнне чэмпіёнка.
У 30-гадовай спартсменкі ўжо ёсць дачка Аляксандра.
Нагадаем, у 2015 годзе беларуска выйграла золата ў бегу на 800 метраў на Чэмпіянаце свету ў Пекіне. За год да гэтага яна стала лепшай у Еўропе. У 2012 годзе ў Хельсінкі стала трэцяй на кантынентальным першынстве. На Алімпіядзе-2016 у Рыа-дэ-Жанейра прыйшла да фінішу толькі сёмай.