МІНСК, 6 мая — Sputnik. Сотні мінчан узялі ўдзел у казачным светлавым флэшмобе ў суботу ў мінскім парку забаў Dreamland.
Гасцей мерапрыемства забаўлялі запальныя барабаншчыцы, скрыпачкі, спевакі, а таксама тэатральныя артысты са святлодыёднай праграмай.
Свята чароўных шароў праходзіць у рамках вялікага арт-праекта, які таксама ўключае ў сябе фестываль фарбаў холі.
Пасля наступлення заходу цэнтральная плошча парку ператварылася ў вялікае чароўнае поле. Атрымаўся выдатны фон, каб зрабіць сэлфі ці проста прыгожую фатаграфію для сацсетак, чым і карысталіся падлеткі, не выпускаючы тэлефоны з рук.
Аднак больш за ўсё было гледачоў з дзецьмі, якія з радасцю махалі яркімі шарамі і проста атрымлівалі асалоду ад таго, што адбываецца. Шары можна купіць на месцы, таксама на тэрыторыі працуе некалькі кропак са стрыт-фудам. Паўнавартасна перакусіць у іх не атрымаецца, затое можна купіць прысмакі або папкорн.
Фестываль будзе доўжыцца два дні, сёння арганізатары абяцаюць фаер і светлавое неонавае шоу ад тэатра "Элементаль". Таксама будуць выступаць музыканты, а ўсе госці могуць прыняць удзел у конкурсах ад вядучых. Пачатак, як і раней, а 21:00, уваход вольны.