ГОМЕЛЬ, 12 мая — Sputnik. Рэгулярныя авіязносіны абласнога цэнтра з Калінінградам і Масквой адкрываюцца ў першы дзень лета.
З 1 чэрвеня па панядзелках і чацвяргах авіякампанія "Белавія" аднаўляе рэйсы ў Калінінград. Напрамак традыцыйна запатрабаваны жыхарамі Палескага рэгіёну. Кошт пералёту складзе ад 63 да 70 еўра. Час адпраўлення з Калінінграда — 09:10, прыбыццё ў Гомель — 11:35, у адваротны бок — 12:05/12:30 (з улікам мясцовага часу). Абслугоўваць рэйсы будуць самалёты CRJ. Апошні рэйс запланаваны на 30 жніўня.
Па серадах, пятніцах і нядзелях у маскоўскі аэрапорт Дамадзедава будзе лётаць расійская авіякампанія "Сібір" на "Боінгах". Кошт гэтай паездкі будзе вагацца ў межах 45-60 еўра ў залежнасці ад тэрмінаў браніравання білета і наяўнасці багажу. З Дамадзедава самалёт узляціць у 09:55 і сядзе ў Гомелі ў 11:20. Адваротны рэйс — у 12:05, праз паўтары гадзіны самалёт прызямліцца ў расійскай сталіцы.
"Сібір" пацвердзіла супрацоўніцтва з аэрапортам Гомеля да 27 кастрычніка. Агаворана, што калі яно будзе прадуктыўным, то дагавор падоўжаць, а колькасць рэйсаў павялічаць, паведаміў намеснік начальніка Гомельскага філіяла дзяржпрадпрыемства "Белаэранавігацыя" Мікалай Мурашка.