МІНСК, 22 мая — Sputnik. Міжнародны конкурс фотажурналістыкі імя Андрэя Сценіна апублікаваў шорт-ліст лаўрэатаў 2018 года. Журы конкурсу, у склад якога ўвайшлі прадстаўнікі вядучых міжнародных інфармацыйных агенцтваў — AFP (Францыя), Anadolu Ajansi (Турцыя), Notimex (Мексіка), а таксама масцітыя фатографы і фотарэдактары з сусветным імем, выбралі лепшыя з 6000 пададзеных работ. Удзельнікамі конкурсу 2018 года сталі маладыя фотарэпарцёры з 77 краін, пры гэтым колькасць заявак з-за мяжы вырасла ў два разы ў параўнанні з мінулым годам.
У лік пераможцаў увайшлі прадстаўнікі 14 краін — фатографы з Расіі, Ірана, Ірака, Ізраіля, Індыі, Бангладэш, Егіпта, Турцыі, Германіі, Італіі, Іспаніі, Беларусі, Кеніі і ПАР. У тройку лідэраў па ліку прадстаўленых работ, якія выйшлі ў фінал, разам з Расіяй і Іранам увайшла Беларусь, абышоўшы Індыю, Ізраіль, Іспанію і ПАР.
Беларускі фатограф Сяргей Гапон выйшаў у фінал конкурсу з фотаработ "Касічка" ў намінацыі "Галоўныя навіны". Таксама ў фінал конкурсу прайшла яго праца "Журавінавае сэрца" ў намінацыі "Мая планета".
У фінал таксама выйшла серыя фатаграфій беларускага фатографа Таццяны Ткачовай "Сезоны Веры" ў намінацыі "Партрэт. Герой нашага часу".
Тэмы работ 2018 года дэманструюць усю шматграннасць жыцця, улучаюць у сябе знакавыя вобразы навакольнай рэчаіснасці — ад амаль біблейскай прыгажосці вапняковых капалень Верхняга Егіпта да кліпавага мантажу паслявыбарных падзеяў у Кеніі восенню 2017 года; ад арктычнай этнікі Ненецкіх качэўнікаў да вобразаў спарціўных спаборніцтваў на тэнісных кортах Ралана Гараса-2017.
Кажучы пра пераможцаў 2018 года, куратар конкурсу імя Андрэя Сценіна, кіраўнік службы візуальных праектаў МІА "Россия сегодня" Аксана Алейнік адзначыла: "Цалкам відавочна, што ў гэтым годзе конкурс зрабіў не толькі колькасны рывок па колькасці ўдзельнікаў або работ, што стала для яго ўжо добрай традыцыяй. Якасны рывок конкурсу — гэта прафесійнае сталенне яго маладых удзельнікаў. Усе працы лаўрэатаў адзначаны небанальным поглядам на тое, што адбываецца, уменнем расказаць запамінальную гісторыю цікавымі візуальнымі сродкамі, сталасцю мыслення і высокім прафесіяналізмам. Фотааб'ектыў пераможцаў конкурсу Сценіна ўжо не проста аператыўна фіксуе рэальнасць у яе яркай дынаміцы, ён робіць відавочнымі яе прычынна-выніковыя сувязі, выкрывае яе фатаграфічны код. Віншуем новых лаўрэатаў з перамогай і жадаем ім поспеху ў далейшай творчым лёсе!"
Старшыня журы конкурсу імя Андрэя Сценіна, кіраўнік фотаслужбы Anadolu Ajansi Ахмет Сел: "Гэты конкурс важны тым, што дапамагае маладым фатографам пачаць кар'еру, для іх ён становіцца добрым стартам. У маладых фатографаў надзвычай востры погляд, яны ўмеюць паказаць тое, чаго мы ў патоку жыцця часам проста не заўважаем. У гэтым годзе сярод розных работ мы змаглі знайсці сапраўдныя шэдэўры! Карыстаючыся выпадкам, я хачу пажадаць ўдачы і поспехаў усім маладым фатографам, якія ўдзельнічаюць у конкурсе імя Сценіна".
Прызавыя месцы фіналістаў будуць абвешчаныя 6 жніўня на сайце конкурсу stenincontest.ru. Узнагароды пераможцам уручаць восенню 2018 года, тады ж адкрыецца выстава іх работ у Маскве.
Пра конкурс:
Міжнародны конкурс фотажурналістыкі імя Андрэя Сценіна, арганізаваны МІА "Россия сегодня" пад эгідай Камісіі РФ па справах ЮНЕСКА, ставіць сваёй мэтай падтрымаць маладых фатографаў і прыцягнуць грамадскую ўвагу да задач сучаснай фотажурналістыкі. Гэта пляцоўка для маладых фатографаў — таленавітых, чулых і адкрытых да ўсяго новага, дзе яны звяртаюць нашу ўвагу на людзей і падзеі побач з намі.
Інфармацыйнае агенцтва і радыё Sputnik з'яўляецца міжнародным інфармацыйным партнёрам конкурсу.