Да 2020 года Беларусі неабходна канчаткова рэалізаваць рэформу сістэмы вышэйшай адукацыі, такая ўмова далейшага членства краіны ў Балонскім працэсе. Аб двухгадовай адтэрміноўцы гаворыцца ў дэкларацыі, прынятай па выніках канферэнцыі міністраў адукацыі Еўропы.
Як раней паведамляў Sputnik, Беларусь стала ўдзельніцай Балонскага працэсу ў 2015 годзе, аднак за 3 гады, адведзеныя на рэфармаванне адукацыйнай сістэмы, не паспела рэалізаваць усе неабходныя пераўтварэнні.
"Мне здаецца, што ўступленне ў Балонскі працэс не мае якога-небудзь значэння і не прынясе глабальных пераменаў для беларускай адукацыйнай сістэмы. Гэта толькі магчымасць камунікацыі для кіраўнікоў сістэм адукацыі. Не больш за тое", — адзначыў настаўнік вышэйшай катэгорыі, вядомы рэпетытар Яўген Лівянт у гутарцы на радыё Sputnik Беларусь.
На думку суразмоўцы Sputnik, узровень вышэйшай адукацыі ў краіне працягвае пагаршацца, і гэта падаецца больш актуальнай праблемай.
"Нам трэба самім зразумець, што ў нас адбываецца з сістэмай адукацыі, у тым ліку і вышэйшай. Па-першае, трэба прызнаць, што ўзровень вышэйшай адукацыі ў краіне імкліва дэградуе, і, зыходзячы з унутраных рэсурсаў, патрэбаў і мэтаў, пачынаць хаця б думаць, як вырашаць гэтую праблему", — сказаў Лівянт.
Поўную версію размовы з настаўнікам вышэйшай катэгорыі, вядомым рэпетытарам Яўгенам Лівянтам слухайце на радыё Sputnik Беларусь.