МІНСК, 1 чэр — Sputnik. Сумесны канцэрт брытанскага аркестра і джазавага калектыву з Беларусі пройдзе ў Мінску 15 чэрвеня, паведамілі Sputnik арганізатары мерапрыемства.
Музыкі з Вялікабрытаніі выступяць у Мінску з імправізацыйнай праграмай Steel-Jazz-Jam. Па словах арганізатараў, на сцэне прагучаць кампазіцыі розных музычных стыляў: ад класічнага джаза да каліпса, лаціна і нават нацыянальнай шатландскай музыкі.
У складзе аркестра Melodians Steel Orchestra — выключна ўдарныя інструменты з рознай вышынёй гуку. Гісторыя брытанскага калектыву налічвае 30 гадоў; выступы музыкаў праходзілі па ўсім свеце: у прыватнасці, у Шатландыі, Аўстрыі, Італіі, Індыі, Паўночнай Карэі і не толькі.
У праграме таксама прымуць удзел музыканты з беларускага калектыву VIP Jazz Андрэя Славінскага. Ініцыятары праекта абяцаюць шмат прыемных нечаканасцяў: для гледачоў артысты рыхтуюць спецыяльныя сюрпрызы.
Канцэрт пройдзе ў канцэртнай зале "Верхні горад" 15 чэрвеня, пачатак а 19-й.