Прэзідэнцкі аркестр Беларусі зноў вяртаецца да выканання папулярнай у публікі праграмы "Дым над вадой", заснаванай на сусветнай рок-класіцы. Гэтую праграму аркестр упершыню прадставіў гледачам тры гады таму, але на гэты раз меламанаў, несумненна, парадуе новае прачытанне рок-хітоў, якія раней не былі ўключаныя ў партытуру.
"Па шматлікіх просьбах нашых гледачоў мы зноў выступім з гэтым праектам. Гэтая праграма заўсёды запатрабаваная, нягледзячы на лета. Яна карыстаецца велізарнай цікавасцю, хоць і выклікае шмат крытыкі, але гэта натуральна. У нас новы вакаліст, пакажам і некалькі прэм'ер", — распавёў Бабарыкін.
Упершыню ў праграме "Дым над вадой" на сцэну выйдзе вакаліст Юрый Селязнёў. Традыцыйна ў праекце прымуць удзел вядомыя беларускія выканаўцы Ксенія Жук, Святлана Шымановіч, Іван Вабішчэвіч і Георгій Калдун. Галоўныя салісты-інструменталісты — гітарысты Улад Мазуркевіч і Ягор Дзыгун.
"Я ў дзяцінстве захапляўся рок-музыкай і зараз зноў, пасля доўгага "джазавага" перыяду, да яе вярнуўся. Мне захацелася зрабіць фантазію на тэмы лепшых твораў Рычы Блэкмора. Я аб'яднаў у фантазіі "Golden Ritchie" чатыры творы эпохі Deep Purple і Rainbow", — распавёў Мазуркевіч.
"Дым над вадой" — гэта класіка рока ў сімфанічнай апрацоўцы. У праграме Прэзідэнцкі аркестр Рэспублікі Беларусь выконвае сусветна вядомыя кампазіцыі такіх гуртоў, як Deep Purple, Metallica, Guns'n'Roses, Scorpions, Queen, Bon Jovi, AC/DC, Aerosmith і іншых рок-калектываў. З праграмай "Дым над вадой" аркестр аб'ездзіў усю Беларусь і неаднаразова выступаў у Расіі. Абноўленую версію праграмы "Дым над вадой" можна пачуць у вялікай зале Палаца Рэспублікі ў Мінску ў пятніцу 8 чэрвеня, пачатак у 19:00.
Гутарку з Віктарам Бабарыкіным і Уладам Мазуркевічам слухайце ў аўдыёзапісе радыё Sputnik Беларусь.