Гучным апынуўся вынік праведзеных на гэтым тыдні адразу некалькімі аўкцыённымі дамамі "рускіх таргоў". Галоўны лот, да якога была прыкавана ўвага, карціна "Таямніца спакусы" пэндзля Казіміра Малевіча, так і не знайшла свайго пакупніка. Карэспандэнт Sputnik Станіслаў Андросік даведаўся, як такое магло адбыцца.
Сенсацыйным поспехам таргоў стала агульная сума прададзеных шэдэўраў — 6,8 мільёна фунтаў стэрлінгаў. Галоўным лотам нечакана стаў малюнак Аляксандра Якаўлева "Арлекін", які сышоў з малатка за 730 тысяч фунтаў стэрлінгаў. Асабліва ўлічваючы той факт, што гэта ўсяго толькі папера, сангіна і вугаль. Першапачатковы кошт быў усяго 150-200 тысяч фунтаў стэрлінгаў.
Праца Казіміра Малевіча "Таямніца спакусы", на адваротным баку якой знаходзіцца яшчэ і партрэт мастака Івана Клюна, была ацэненая ў 250-350 тысяч фунтаў стэрлінгаў.
Бывала і не раз
"Адназначнага адказу, чаму не прадалі ў гэты раз, няма. Думаю, што тут галоўную ролю адыграла рэкламная кампанія і тое, з якім зачараваннем аўкцыённы дом распавядаў пра гэтыя працы", — лічыць куратар карпаратыўнай калекцыі "Белгазпрамбанка" Аляксандр Зіменка.
Аўкцыён у Лондане здолеў прыцягнуць вялікую колькасць пакупнікоў, якія нават за менш цікавыя лоты добра таргаваліся.
"Калі чарга дайшла да Малевіча, сур'ёзныя гульцы аддалі перавагу купіць некалькі прац іншых аўтараў. Такое бывала не раз і ў першую чаргу з заходнееўрапейскімі мастакамі. Сітуацыя звязаная з тым, што аўкцыён перагрэў рынак, распавядаючы пра тое, наколькі гэта сур'ёзная праца", — растлумачыў мастацтвазнаўца.
У выніку пакупнікі, падазраючы, што кошт пры продажы з малатка значна перасягне эсцімэйт, аддалі перавагу менш знакамітым лотам.
Касу зрабіў Кітай
"На працягу апошніх 10-15 гадоў мы бачым вельмі сур'ёзную цікавасць з боку кітайскіх пакупнікоў. Гэта тлумачыцца тым, што пераймаючы амерыканскія і еўрапейскія бізнес-мадэлі, у Кітаі пачынаюць звяртаць увагу на карпаратыўную і сацыяльную адказнасць", — распавёў Аляксандр Зіменка.
Стабільны попыт на прадметы раскошы пацягнуў за сабою цікавасць і да прадметаў мастацтва, што падтрымліваецца і дзяржавай, якая зацікаўлена ў стварэнні музейных і галерэйных калекцый у Кітаі.
"Гэта дапаможа змяніць імідж ад краіны-вытворцы з таннай працоўнай сілай да развітой краіны. Вядома пра праекты буйных арт-комплексаў і ў Шанхаі, і ў Пекіне. Плануецца збіраць калекцыі і запрашаць аўтараў, якія будуць працаваць на працягу некалькіх месяцаў і на гэтай аснове ствараць калекцыі сучаснага мастацтва", — выказаў меркаванне куратар праекта "Арт-Беларусь".
Два ў адным
Цікавасць кітайскіх калекцыянераў да "рускіх таргоў" у Лондане стала вынікам добрай рэкламнай кампаніі і маркетынгу.
"Аўкцыёны тлумачаць, наколькі цікавыя і прывабныя мастакі, і рускія, у прыватнасці. Мы падыходзім да юбілеяў аўтараў і іх канцэптуальных твораў. Таму і Суцін будзе добра прадавацца ў год яго 125-годдзя", — адзначыў Зіменка.
Палатно Малевіча, выстаўленае на аўкцыён, было двухбаковым, што з'яўляецца даволі распаўсюджанай з'явай. Часцей за ўсё такія працы сустракаюцца ў мастакоў, якія працавалі на мяжы XIX і XX стагоддзяў.
Часам з-за канцэптуальных рашэнняў, часам з-за банальнай адсутнасці палотнаў мастакі распісвалі не толькі адваротны, але і пярэдні бок.
"У многіх аўтараў, сапраўды, пярэдні бок больш вядомы. Про адваротныя бакі ведалі менш. Наяўнасць твора, цікавага з двух бакоў, ускладняе задачу па экспанаванні, але наведвальнікам гэта дададае цікавасці ўбачыць, што ж знаходзіцца на адваротным баку карціны", — падкрэсліў мастацтвазнаўца.