Тыдзень мужчынскай моды ў Парыжы: шырачэнныя штаны, хустачкі і латэкс

Калекцыі haute couture прадставілі Louis Vuitton, Alexander McQueen, Raf Simons, Kenzo, Maison Margiela, Valentino і іншыя.

У вобразах высокай моды знакамітых дызайнераў свету добра прасочваюцца трэнды будучага моднага сезону: шырокія штаны, аб'ёмныя паліто, шорты, ноткі вулічнай моды ў абутку, прынты, смелыя колеры і новыя аксэсуары, латэкс і празрыстыя тканіны.

1 / 18

Kenzo прапанаваў касцюмы - блэйзеры і аб'ёмныя шырокія штаны - з бавоўны, паласатыя або манахромныя, кіслотных колераў. Вельмі шырокія штаны ў калекцыі Kenzo былі прадстаўлены ў камплекце з трыкатажным топам з выявай птушкі фенікс або дракона.

2 / 18

Раф Сіманс заігрывае з высокай модай: атласныя паліто з вялізнымі плячыма, мехаватыя аб'ёмныя формы, бліскучыя світэры, футболкі з фотапрынтамі і масіўныя красоўкі стануць знакавымі элементамі ў гардэробе моднікаў наступным летам.

3 / 18

Dior Homme 2019 з новым крэатыўным дырэктарам Кімам Джонсам - гэта эстэтыка карункавых кашуль і кветкавых прынтаў, мінімалізм кветак і формаў.

4 / 18

Кароткія шорты і пінжакі на голае цела і зусім трохі вулічнай моды, якая праскочыла ў выбары абутку, - усё гэта новы Dior.

5 / 18

Першая праца дызайнера Вірджыла Абло для Louis Vuitton (раней ён працаваў толькі для ўласнага брэнда Off-White). У гэтай калекцыі на Тыдні моды ў Парыжы ён зрабіў стаўку на колер: шмат белага, а таксама тыя колеры, на якія распадаецца прамень святла, праходзячы праз прызму.

6 / 18

Аб'ёмныя формы, разнастайныя прынты і бліскучыя матэрыялы - з лёгкай рукі Абло грань паміж светам высокай моды і вулічным стылем сыходзіць на нішто. Louis Vuitton вядомы ў асноўным сваімі аксэсуарамі, і іх рэканструкцыя была заўважаная асабліва ярка: сумкі і кашалькі змянілі кабура, рамяні бяспекі і ахоўныя камізэлькі на маланцы.

7 / 18

Свабодныя паліто, камізэлькі з аб'ёмнымі кішэнямі, кароткія шорты прадставіў і Sean Suen.

8 / 18

Джон Гальяна для Maison Margiela "на шляху да пабудовы новай пачуццёвасці і сэксуальнасці". Па версіі майстры, новая сэксуальнасць будзе пабудавана на трох кітах: skinny латэксных штанах, скураных гарсэтах і высокіх каўбойскіх ботах. З аксесуараў - рамяні і масіўныя сумкі кантрасных колераў.

9 / 18

Наўрад ці каму хопіць адвагі паўтарыць вобразы Maison Margiela ў звычайным жыцці: гэтая калекцыя - haute couture ў чыстым выглядзе.

10 / 18

Бельгіец Вальтэр ван Бейрэндонк відавочна на пенсію не збіраецца: ён вывеў на подыум свежыя вобразы і яркія прынты з ослікамі і качачкамі.

11 / 18

Брэнд Balmain прадставіў калекцыю, у якой паспрабаваў злучыць французскую і амерыканскую культуры. Паказ не выпадкова прайшоў у будынку МЗС Францыі.
Ад Францыі тут - чырвона-бела-сіняя каляровая гама, ад ЗША - спартыўная тэма і прынт.

12 / 18

І таму, хто не сочыць за модай, адразу відаць, кім натхняўся крэатыўны дырэктар Balmain Аліўе Рустэн. То на чырвоным скураным пінжаку, то на чорна-белай футболцы з'яўляліся надпісы з песень Майкла Джэксана. Ды і ў сілуэтах адгадваўся вобраз караля поп-музыкі.

13 / 18

Феерычна маляўнічая і вельмі дзіўная калекцыя Thom Browne была прадстаўлена на фоне газончыкаў, агароджы, гномікаў і яркіх хатак - своеасаблівае ўвасабленне амерыканскай мары.

14 / 18

Аб'ёмныя пінжакі і паліто коміваяжораў, капялюшыкі добрапрыстойных амерыканцаў, яркія тканіны і прынт - Thom Browne нібы смяецца над "белай Амерыкай".

15 / 18

Пьерпаала Пічолі для Valentino зноў уваскрашае 70-е і 80-я гады мінулага стагоддзя.

16 / 18

Прынт-камуфляж і прынт-лога, звыклы для Valentino, злучаюцца з класічнымі тканінамі і красоўкамі.

17 / 18

Але ўсё ж гэта мода haute couture, заяўляе Valentino, дадаючы кветкі, бісер і нават пёры.

18 / 18

Дызайнер Сара Бертан для брэнда Alexander McQueen прапанавала пінжакі, паліто і іншыя элементы класічнага мужчынскага гардэроба, сабраўшы іх па-новаму. У якасці крыніц натхнення яна выкарыстала карціны Фрэнсіса Бэкана і фатаграфіі Джона Дыкіна.