МІНСК, 4 ліп — Sputnik. Прэзідэнт брэсцкага "Дынама" Дыега Марадона прыедзе ў Беларусь 16 ліпеня, вынікае з запісу футбаліста ў сацсетках, гэтую інфармацыю пацвердзілі Sputnik і ў самім клубе.
"Прывітанне! Гэта Дыега Марадона! Мы ўбачымся з вамі ў Беларусі 16 ліпеня. Таксама хачу пазнаёміцца з прэзідэнтам Лукашэнкам і пачаць працаваць у Беларусі!" — напісаў Марадона.
Аргентынец падпісаў кантракт з "Дынама" яшчэ ў маі, але пакуль не прыязджаў у клуб з-за таго, што быў на Чэмпіянаце свету ў Расіі. За наведванне кожнай гульні ФІФА плаціла яму 11 тысяч еўра, аднак пасля інцыдэнту на матчы, падчас якога Марадона паводзіў сябе непрэзентабельна, кантракт разарвалі.
Прэс-сакратар брэсцкага "Дынама" Вольга Хіжынкова пацвердзіла Sputnik прыезд новага прэзідэнта клуба. Легендарны футбаліст будзе прысутнічаць на матчы "Дынама" — "Шахцёр".
"Так, ён сапраўды прыедзе ў Беларусь і будзе прысутнічаць на матчы. Пакуль план мерапрыемстваў па сустрэчы Дыега Марадоны прапрацоўваецца. Больш канкрэтна пра гэта мы раскажам крыху пазней", — распавяла Хіжынкова.
Матч Беларускай вышэйшай футбольнай лігі з удзелам брэсцкага "Дынама" і салігорскага "Шахцёра" пройдзе 16 ліпеня ў АСК "Брэсцкі". Брастчане ў рэйтынгу каманд займаюць з 22 ачкамі восьмае месца, салігорцы — трэцяе.