МІНСК, 26 ліп — Sputnik. Аранжавы ўзровень небяспекі зноў абвешчаны ў Беларусі на чацвер 26 ліпеня, паведамілі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя.
У Беларусі захоўваецца цёплае надвор'е, аднак ужо некалькі дзён у розных раёнах рэспублікі ідуць ліўні і навальніцы з парывістым ветрам. Аб неспрыяльнай метэаралагічнай з'яве сіноптыкі папярэдзілі беларусаў і ў чацвер.
Па дадзеных спецыялістаў, днём 26 ліпеня на большай частцы тэрыторыі Беларусі чакаюцца навальніцы, у паўднёва-ўсходняй частцы рэспублікі месцамі пройдуць моцныя ліўні. Тэмпература паветра ў гэты дзень падымецца максімум да 30 градусаў цяпла — у асобных раёнах Гомельскай і Брэсцкай абласцей.
У Мінскай вобласці будзе воблачна з праясненнямі. Ноччу ў некаторых раёнах, а днём амаль па ўсёй вобласці пройдуць кароткачасовыя дажджы, прагрымяць навальніцы з парывістым ветрам. У ранішнія гадзіны магчымы слабы туман. Тэмпература ноччу апусціцца да +15..+20°С, а днём паветра прагрэецца да +24..+29°С.