МІНСК, 8 жні — Sputnik. Музычны фестываль, які праводзіцца ў Мірскім замку кожнае лета, пачынаючы з 2012 года, адменены — пра гэта паведамілі арганізатары на старонцы фестывалю ў Facebook.
"У гэтым годзе абавязковай умовай правядзення фестывалю стала арэнда некалькіх пляцовак каля замка. Адміністрацыя музея ў арэндзе нам адмовіла. Афіцыйнага адказу на афіцыйны запыт з боку музея не было", — тлумачыцца ў запісе.
Арганізатары фестывалю выказалі надзею, што ў будучыні змогуць прадставіць публіцы іншыя не менш захапляльныя і маштабныя музычныя праекты і падзякавалі гледачам за ўвагу да фестывалю і станоўчую энергетыку, якая "па-сапраўднаму акрыляла і матывавала".
Афіцыйны сайт фестывалю больш недаступны, у групах у сацыяльных сетках гледачы выказваюць сваё шкадаванне.
"Гэтыя пару дзён у 16 годзе сталі для нас ці ледзь не цэлай эпохай. Столькі ўспамінаў і падзей адбывалася ў той час. Дзякуй за тое, што змагаліся", — напісала карыстальнік Вераніка Астапава.
"Мірум — лепшы фестываль у сінявокай! У каляндар заносіла з першым анонсам і нішто не магло паўплываць на паездку. Хоць на пару гадзін, але абавязкова. Дзякуй вам!" — пакінула каментар Palina Maskaliova.
На сайце Мірскага замка навіны пра лёс фестываля адсутнічаюць.