МІНСК, 14 жні — Sputnik. У Нацыянальным аэрапорце Мінск у панядзелак увечары сустрэлі беларускую бягуху Вольгу Мазуронак, на месцы падзей пабываў і карэспандэнт Sputnik.
Спартсменка ў нядзелю выйграла марафон Чэмпіянату Еўропы па лёгкай атлетыцы ў Берліне. Беларуска гераічна прайшла дыстанцыю першай, нягледзячы на крывацёк з носа, які пачаўся праз паўгадзіны з пачатку забегу. Медыкі стараліся дапамагчы дзяўчыне, перадаючы ёй сурвэткі і ваду, але кроў спынілася толькі на 17-м кіламетры.
У Мінску падчас спаборніцтва Вольгу падтрымлівалі калегі і сябры, сярод якіх старшыня Беларускай федэрацыі лёгкай атлетыкі Вадзім Дзевятоўскі. Ён прызнаўся, што не можа стрымаць слёз ад таго, што ўбачыў на марафонскай трасе.
Як распавяла журналістам Мазуронак, тое, што адбылося на дыстанцыі ў Берліне звязана з рэзкім перападам тэмператур.
"Да прыезду была жудасная спякота, а потым адбыўся рэзкі спад тэмпературы", — сказала яна.
Пры гэтым спартсменка адзначыла, што зараз нармальна сябе адчувае. "Адчуваю сябе добра. Тая сітуацыя не мае ніякіх наступстваў для здароўя і не небяспечная. Вядома, з боку гэта выглядала неэстэтычна, але гэта спорт і трэба было ісці да канца", — сказала яна.
Мазуронак таксама паведаміла, што не адчувала разгубленасці на дыстанцыі.
"Я не разгубілася, не было страху. Але калі прабягала міма табло і ўбачыла сябе — была ў жаху", — прызналася лёгкаатлетка.
Спартсменка распавяла, што бліжэйшы час плануе прысвяціць адпачынку пасля спаборніцтваў, а затым прыступіць да падрыхтоўкі да вераснёвага Мінскамга паўмарафону.
Акрамя Мазуронак, на дыстанцыі беглі яшчэ дзве беларускі — Марына Даманцэвіч і Анастасія Іванова, яны занялі чацвёртае і пятае месцы.