ГРОДНА, 20 жні — Sputnik, Іна Грышук. Напярэдадні Яблычнага Спасу ў Гродзенскай вобласці пачалі цвісці яблыні, але спецыялісты па плодаагародніцтву гэтую з'яву не называюць анамальнай і не звязваюць яе з нязвыкла гарачым для беларускіх шырот летам.
Фота квітнеючай яблыні было зроблена на прысядзібным участку ў Навагрудскім раёне. Гаспадыня Яўгенія Падалянчык распавяла, што на маладым дрэўцы кветкі з'явіліся напярэдадні Яблычнага Спасу. У маі яблыня не квітнела, пладоў на ёй няма, хоць у мінулым годзе яна прынесла невялікі ўраджай у традыцыйны для плодаагароднінных дрэў час.
Квітнеючую ў жніўні яблыню гаспадыня назірае ўпершыню, кажа, што бачыла нядаўна квітнеючыя яблыні ў адным з маладых садоў раёна. Анамальна позняе красаванне Яўгенія Уладзіміраўна назірала таксама у вішні — некалькі кветак распусцілася ў канцы ліпеня, а да канца жніўня паспелі паспець пазнейшыя ягады.
Жнівеньскае красаванне яблынь або іншых садовых дрэў спецыялісты не звязваюць з анамальна цёплым летам. Як патлумачыў Sputnik дацэнт кафедры плодаагародніцтва і лугаводства Гродзенскага аграрнага ўніверсітэта Сяргей Собалеў, гэта рэакцыя раслін на пашкоджанне пупышак узімку.
"Пупышкі дрэў падмерзлі, былі пашкоджаныя, развіццё пайшло няправільна. Такія выпадкі мы рэгіструем кожны год", — растлумачыў Собалеў.
Паводле слоў спецыяліста, пазнейшыя кветкі трэба абрываць. Бо плады не змогуць паспець, а красаванне моцна аслабіць дрэва перад зімой, і яно можа дрэнна перажыць халодны перыяд года.