МІНСК, 14 вер — Sputnik. Дэпутат Палаты прадстаўнікоў Беларусі Валерый Барадзеня прызначаны першым прарэктарам Акадэміі кіравання пры прэзідэнце, паведамляе Sputnik.
Валерый Барадзеня — намеснік старшыні Пастаяннай камісіі па бюджэце і фінансах беларускага парламента.
Як высветліў Sputnik, зараз у Барадзені ёсць яшчэ адна праца — ён прызначаны першым прарэктарам Акадэміі кіравання пры прэзідэнце. Адначасова ён захавае і дэпутацкі мандат — як растлумачылі ў Палаце прадстаўнікоў, Барадзеня будзе працаваць да канца тэрміну.
Беларускім дэпутатам забараняецца выконваць любую аплачваную працу, аднак выключэнні робяцца для педагагічнай, навуковай, культурнай сфер, а таксама творчай дзейнасці і медыцынскай практыкі.
Дэпутат Барадзеня прадстаўляе Васняцоўскую выбарчую акругу (Мінск), у Палаце прадстаўнікоў ён працуе ўжо другі тэрмін запар.
Да абрання дэпутатам Барадзеня меў досвед працы ў вышэйшых навучальных установах, у тым ліку, узначальваў факультэт маркетынгу Беларускага дзяржаўнага эканамічнага ўніверсітэта (БДЭУ).
Прэзідэнт Беларусі Аляксандр Лукашэнка ў гэтым годзе заявіў пра неабходнасць зрабіць з Акадэміі кіравання адну з вядучых ВНУ краіны. Змяніўся ў гэтым годзе і рэктар установы — ім стаў былы кіраўнік Вышэйшай атэстацыйнай камісіі Генадзь Пальчык.