МІНСК, 30 вер — Sputnik. Пісьменнік, аўтар больш за 20 кніг і мноства карцін, выдавец і ўвогуле знакавая фігура беларускай культуры Адам Глобус напярэдадні адзначыў сваё 60-годдзе. Разам з аматарамі яго творчасці на мерапрыемстве пабываў і Sputnik.
Як заўсёды эпатажны і неабмежавана творчы Глобус запрасіў гасцей і сяброў на "распусную" выставу. Сябры і госці свята сабраліся ў галерэі сучаснага мастацтва "Ў", каб павіншаваць аўтара і атрымаць асалоду ад мастацтва пра каханне, якім была прасякнута паветра.
Сярод знакамітых наведвальнікаў — беларускі пісьменнік Альгерд Бахарэвіч, мастак і дызайнер Уладзімір Цэслер, пісьменніца Людміла Рублеўская і бізнэсовец Павел Данейка. Былі і проста тыя, хто завітаў атрымаць атрымаць асалоду ад распуснага мастацтва.
Многа добрых слоў гучала ў адрас юбіляра, але сапраўдным дэвізам вечара стала віншаванне дырэктаркі і куратаркі галерэі Валянціны Кісялёвай, якая нагадала прысутным, што ў свае 60 "гэты мужчына — проста сэкс".
"Лепш займацца каханнем, чым вайной — пра гэта мая сённяшняя выстава", — падтрымаў віншаванне сам Глобус.
Ён падзякаваў галерэі за тое, што атрымалася выставіць тое мастацтва, якое лічыць мастацтвам ён сам, а не хтосьці іншы.
Акрамя самога юбіляра цвіком праграмы стала карціна "Адам і Ева", на якой паказаны іх апошні дзень у раю. Яе прадалі з аўкцыёна за 155 беларускіх рублёў.
Смелае і гучнае выяўленчае мастацтва на выставе суправаджалася апавяданнямі і вершамі Адама Глобуса, якія ў атачэнні карцін сталі яшчэ больш сімвалічнымі і пажадлівымі.