Галоўны трэнер ЦСКА Віктар Ганчарэнка прысвяціў перамогу "армейцаў" над "Рэалам" аднаму з заснавальнікаў барысаўскага футбольнага клуба БАТЭ Анатолю Капскаму, які нядаўна пайшоў з жыцця. Sputnik вырашыў успомніць час, калі Ганчарэнка вадзіў барысаўчан у бой у матчах Лігі чэмпіёнаў.
Да пераходу ў трэнерскі склад Ганчарэнка, выхаваны ў Хойніцкай ДЮСШ, а затым у мінскім РУАРы, з 1995 года гуляў у розных беларускіх клубах і за рэспубліканскую зборную, а праз тры гады перайшоў у БАТЭ. З барысаўчанамі ён двойчы стаў чэмпіёнам Беларусі і адзін раз бронзавым прызёрам. Аднак кар'еру гульца перакрэсліла траўма.
Ад дубля да Лігі чэмпіёнаў
З 2004 па 2006 год Ганчарэнка быў трэнерам дублюючага саставу каманды, а ў 2007-м — галоўным трэнерам клуба. І ўжо ў 2008-м БАТЭ зрабіў фурор, выйшаўшы ў групавы этап Лігі чэмпіёнаў, дзе сыграў унічыю з "Ювентусам" і "Зенітам".
Наступныя два сезоны клуб правёў па-за Лігай чэмпіёнаў, аднак у 2011-м удача зноў усміхнулася барысаўчанам. Але ненадоўга — матчы з такімі грандамі сусветнага футбола, як "Барселона" і "Мілан", не пакінулі падапечным Ганчарэнкі ніводнага шанцу.
Трэці выхад БАТЭ ў групавы этап ЛЧ адбыўся годам пазней. І зноў сенсацыя — спачатку гасцявая перамога над "Лілем" (3:1), а затым хатняя перамога над "Баварыяй" з такім жа лікам. Заўзятары тады радаваліся.
Ці не занадта жорсткі
Амаль увесь час пасля першага выхаду ў групавыя этапы Лігі чэмпіёнаў Ганчарэнку журналісты сваталі то ў "Кубань", то ў ЦСКА, то ва львоўскія "Карпаты". І ў 2013-м кар'ера трэнера ў БАТЭ ўсё ж завяршылася — ён перайшоў у "Кубань", маючы на руках кантракт на 4,5 года і зарплату каля мільёна еўра ў год. Аднак нягледзячы на тое, што клуб пачаў сезон з дзевяці перамог, Ганчарэнка прабыў у "Кубані" крыху больш за год і быў адпраўлены ў адстаўку з фармулёўкай "адсутнасць жорсткасці ў зносінах з футбалістамі".
Улетку 2015 года Ганчарэнка стаў галоўным трэнерам екацярынбургскага "Урала", аднак пакінуў клуб пасля шасці гульняў. Пасля адбыўся яго першы прыход у ЦСКА, які тады яшчэ ўзначальваў Леанід Слуцкі. Прабыўшы там менш за год на пасадзе старшага трэнера, Ганчарэнка пакінуў клуб, вырашыўшы працягнуць самастойную працу, і ў чэрвені 2016-га ўзначаліў "Уфу", але ненадоўга.
І зноў "армейцы"
Кажуць, галоўны трэнер "чырвона-сініх" Леанід Слуцкі доўга шукаў сабе замену перад тым, як пакінуць клуб, які ён узначальваў сем гадоў і атрымаў мноства перамог. І Ганчарэнка, які стаў у 2016-м лепшым трэнерам Беларусі ўжо ў шосты раз, як ніхто іншы падыходзіў на гэтую пасаду. У інтэрв'ю Sputnik Ганчарэнка адзначаў, што Слуцкаму, які трэніруе таксама зборную Расіі, не хапае сіл яшчэ і на клуб.
"Армейцы" пад кіраўніцтвам Ганчарэнкі сталі двойчы віцэ-чэмпіёнамі Расіі, а ў сезоне 2017/18 пераадолелі два раўнда кваліфікацыі Лігі чэмпіёнаў, абыграўшы АЕК з Грэцыі і "Янг Бойз" са Швейцарыі без адзінага прапушчанага гола.
На старт новага групавога этапу ЛЧ ЦСКА здолеў выратавацца ад паразы ў матчы з чэшскай "Вікторыяй" (2:2), а пасля дэрбі з маскоўскім "Спартаком" Ганчарэнка адразу ж паляцеў у Барысаў на пахаванне Анатоля Капскага, даслаўшы на пасляматчавую канферэнцыю старэйшага трэнера Сяргея Аўчыннікава.
"Ён (Капскі — Sputnik) не думаў, што яму дрэнна на дадзены момант, ён думаў, як зрабіць лепш іншым. Гэта боль, які назаўжды са мной", — успамінаў Ганчарэнка.
І пасля матчу з "Рэалам" галоўны трэнер "армейцаў" зноў успомніў свайго былога настаўніка, назваўшы яго "другім бацькам" і адзначыўшы, што Капскі ў чарговы раз парадаваўся б перамозе разам з ім. А беларускія аматары ў чарговы раз рады таму, што Ганчарэнка памятае пра свае карані.